ഇന്ത്യയിൽ നിന്ന് ഭർത്താവിനെ വേണം ! ഷോപ്പിങ് മാളിൽ ക്യൂആര്‍ കോഡുമായി റഷ്യന്‍ യുവതി

ഇന്ത്യയിൽ നിന്ന് ഭർത്താവിനെ വേണമെന്ന റഷ്യൻ യുവതിയുടെ പോസ്റ്റ് വൈറലാകുന്നു. ഇന്ത്യയിലെ ഒരു ഷോപ്പിങ് മാളിന് മുന്നിൽ ക്യു ആർ കോഡുമായി നിൽക്കുന്ന റീൽ, യുവതി തന്നെയാണ് സമൂഹമാദ്ധ്യമത്തിലൂടെ പങ്കുവച്ചിരിക്കുന്നത്. ഇന്ത്യൻ വരനെ കണ്ടെത്താൻ സഹായിക്കൂ എന്ന കുറിപ്പോടെയാണ് യുവതിയുടെ പോസ്റ്റ്.

മോസ്കോ സ്വദേശിയായ ദിനാര എന്ന യുവതിയാണ് വ്യത്യസ്തമായ രീതിയിൽ വരനെ അന്വേഷിക്കുന്ന വിഡിയോ പങ്കുവച്ചിരിക്കുന്നത്. ഇന്ത്യൻ സംഗീതത്തെയും ഭക്ഷണത്തെയും ഏറെ ഇഷ്ടപ്പെടുന്ന ദിനാര, ഇന്ത്യയിൽ സന്ദർശനം നടത്തിയിരുന്നു. ഈ സമയത്താണ് വരനെ അന്വേഷിക്കുന്ന വിഡിയോ എടുത്തത്. രണ്ട് മാനെക്വിനുകൾക്ക് അരികിൽ ക്യു ആർ കോഡും കൈയിൽ പിടിച്ച് നിൽക്കുന്ന വിഡിയോയിൽ ദിനാരയുടെ ഇൻസ്റ്റാഗ്രാം പ്രൊഫൈലിലേക്ക് നേരിട്ട് ലിങ്ക് ചെയ്യുന്ന ക്യുആർ കോഡും കാണാം. താൽപര്യമുള്ള വ്യക്തികൾക്ക് അവരുമായി നേരിട്ട് ബന്ധപ്പെടാൻ ഇതുവഴി സാധിക്കും.

അതേസമയം, റീൽ വൈറലായതോടെ ദിനാരയുടെ ഇൻസ്റ്റഗ്രാം ഫോളോവഴ്സിന്റെ എണ്ണവും വർധിച്ചിരിക്കുകയാണ്. പലരും ദിനാരയുടെ പോസ്റ്റിന് ആശംസകൾ അറിയിച്ച് കൊണ്ടും രംഗത്തെത്തിയിട്ടുണ്ട്. എന്നാൽ, മുൻപും ഇന്ത്യൻ വരനെ ആവശ്യമുണ്ടെന്ന രീതിയിലുള്ള പോസ്റ്റുകൾ ദിനാര പങ്കുവച്ചിട്ടുണ്ട്. ഒരിക്കൽ മോസ്കോയിൽ വെച്ച് ഒരു ഇന്ത്യൻ ജ്യോത്സ്യനെ പരിചയപ്പെടുകയും അദ്ദേഹം തന്റെ അടുത്ത പിറന്നാളിന് മുൻപ് ഇഷ്ടപ്പെട്ട ആളെ കണ്ടെത്തും എന്ന് പ്രവചിക്കുകയും ചെയ്തെന്ന് ദിനാര പറയുന്നു. അതിനുശേഷമാണ് ഇന്ത്യയിലേക്ക് ദിനാര യാത്ര നടത്തുന്നത്.