തെറ്റ് ആർക്കും പറ്റാം, ദിലീപ് എന്ന നടനെ ഇപ്പോഴും ഇഷ്ടമാണ്: അദ്ദേഹത്തിന്റെ ഡേറ്റ് കിട്ടിയാൽ അടുത്ത സിനിമ ചെയ്യുമെന്ന് ഒമർ ലുലു

നടൻ ദിലീപിന്റെ ഡെയ്റ്റ് കിട്ടിയാൽ താൻ സിനിമ ചെയ്യുമെന്ന് സംവിധായകൻ ഒമർ ലുലു. നടി ആക്രമിക്കപ്പെട്ട സംഭവത്തിൽ നടി തന്റെ അതിജീവന യാത്രയെ കുറിച്ച് കഴിഞ്ഞ ദിവസം എഴുതിയ കുറിപ്പ് ഏറെ ചർച്ച ചെയ്യപ്പെട്ടിരുന്നു. നിരവധിപേർ നടിയ്ക്ക് അനുകൂലമായി വന്നിരുന്നു. ഇതിനു പിന്നാലെയാണ് ഒമർ ലുലുവിന്റെ ഈ പ്രതികരണം.

കോടതിയിൽ നടന്ന് കൊണ്ടിരിക്കുന്ന കേസിൽ ദിലീപ് കുറ്റക്കാരനാണെന്ന് തെളിഞ്ഞാൽ അദ്ദേഹം ശിക്ഷിക്കപെടുമെന്നും, അല്ലെങ്കിൽ കേസിൽ നിന്ന് കുറ്റവിമുക്തനാകുമെന്നും ഒമർ ലുലു വ്യക്തമാക്കുന്നു. മാത്രമല്ല തെറ്റ് ആർക്കും പറ്റാമെന്നും തെറ്റ് സംഭവിക്കാനുള്ള സാഹചര്യം എന്താണെന്ന് അറിയില്ലെന്നുമാണ് ഒമർലുലു പറയുന്നത്.

ദിലീപ് എന്ന നടനെ ഇപ്പോഴും ഇഷ്ടമാണ് അയാളുടെ ഡെയ്റ്റ് കിട്ടിയാൽ തീർച്ചയായും ഞാന്‍ സിനിമ ചെയ്യും. അയാൾ തെറ്റ് ചെയ്തു എന്നു കോടതിക്ക് തെളിഞ്ഞാൽ ശിക്ഷിക്കപ്പെടും. ഇല്ലെങ്കിൽ കേസിൽ നിന്ന് കുറ്റവിമുക്തനാക്കും. എല്ലാവർക്കും എപ്പോഴും ശരി മാത്രം അല്ലല്ലോ തെറ്റും പറ്റാം എല്ലാവരും മനുഷ്യൻമാർ അല്ലേ തെറ്റ് സംഭവിക്കാൻ ഉള്ള സാഹചര്യം നമ്മുക്ക് എന്താണെന്ന് അറിയില്ല അതിൽ ഉൾപ്പെട്ടവർക്ക് മാത്രമേ അറിയു അതുകൊണ്ട് “സത്യം ജയിക്കട്ടെ’, ഒമർ ലുലു തന്റെ ഫേസ്‌ബുക്കിൽ കുറിച്ചു.

അതേസമയം നിരവധി പേരാണ് ഒമർലുലുവിന്റെ കുറിപ്പിനെ വിമർശിച്ച് എത്തിയത്. അതിന് പിന്നാലെ ഗോവിന്ദചാമിയുമായി ദിലീപിനെ ഉപമിക്കേണ്ടതില്ലെന്നും അദ്ദേഹം പറഞ്ഞു. ദിലീപ് നിലവിൽ പ്രതിയാണെന്നും കുറ്റക്കാരൻ അല്ലെന്നും ഒമർ ലുലു ചൂണ്ടിക്കാണിക്കുന്നു. തന്റെ പോസ്റ്റിനു താഴെ കമന്റ് ആയിട്ടായിരുന്നു ഒമർ ലുലു ഇങ്ങനെ വ്യക്തമാക്കിയത്.

‘ഗോവിന്ദചാമി എന്ന മനുഷ്യനെ ആദ്യമായി ഞാന്‍ കാണുന്നത് ആ പീഡന കേസിൽ ആണ്. ദിലീപ് എന്ന നടനെ ഞാന്‍ ചെറുപ്പം മുതലേ ഇഷ്ട്ടപ്പെട്ടിരുന്നു. എന്നെ സ്കൂൾ കാലഘട്ടം മുതൽ ഒരുപാട്‌ സ്വാധീനിച്ച വ്യക്തിയാണ് ദിലീപ്. പഞ്ചാബീ ഹൗസ് എന്ന സിനിമ ഞാൻ സ്കൂളിൽ പഠിക്കുന്ന കാലം മുതലേ ഇപ്പോഴും എന്റെ പ്രിയതാരം ആണ്.

അത്കൊണ്ട് ഗോവിന്ദചാമിയേ വെച്ച് ദിലീപിനെ ചെക്ക് വെക്കുന്ന രീതി മണ്ടൻമാരുടെ അടുത്ത് കൊണ്ട്‌ പോയി വേവിക്കുക, ഇവിടെ വേണ്ടാ. കേസ് വിധി വരുന്ന വരെ പ്രതിയാണ് അല്ലാതെ കുറ്റക്കാരൻ അല്ലാ’, ഒമർ ലുലു എഴുതി.