ഹാൻഡ്‌വാര നാർക്കോ തീവ്രവാദ കേസിൽ ആറ് പേർക്കെതിരെ എൻഐഎ കുറ്റപത്രം സമർപ്പിച്ചു

ദില്ലി: ഹാൻഡ്‌വാര നാർക്കോ തീവ്രവാദ കേസിൽ ആറ് പേർക്കെതിരെ എൻഐഎ കുറ്റപത്രം സമർപ്പിച്ചു. ജമ്മു കശ്മീരിലും രാജ്യത്തിന്റെ മറ്റു ഭാഗങ്ങളിലും തീവ്രവാദ പ്രവർത്തനങ്ങൾക്കായി പണം സമ്പാദിക്കാൻവേണ്ടി അതിർത്തി കടന്നുള്ള മയക്കുമരുന്ന് കള്ളക്കടത്തിൽ ഉൾപ്പെട്ട ആറ് പേർക്കെതിരെയാണ് ദേശീയ അന്വേഷണ ഏജൻസി (എൻഐഎ) കുറ്റപത്രം സമർപ്പിച്ചത്. ഈ ജൂണിൽ ജമ്മു കശ്മീരിലെ ഹാൻഡ്‌വാരയിൽ നിന്ന് ഒരു കോടിയിലധികം വിലവരുന്ന 21 കിലോ മയക്കുമരുന്ന് പിടിച്ചെടുത്തതിനെത്തുടർന്നാണ് കള്ളക്കടത്ത് കേസിന്റെ അന്വേഷണം ഏറ്റെടുത്തതെന്ന് എൻഐഎ പുറത്തുവിട്ട പ്രസ്താവനയിൽ പറയുന്നു. അഞ്ചുമാസംമുൻപ് കേസിലെ മറ്റ് രണ്ട് പ്രതികളായ സയ്യിദ് ഇഫ്തിഖാർ ആൻഡ്രാബി, ഇസ്ലാം-ഉൽ-ഹഖ് പിയർ എന്നിവരെ അറസ്റ്റ് ചെയ്തിരുന്നു. തുടർന്ന് നടത്തിയ അന്വേഷണത്തിൽ പ്രതികളിലൊരാളായ അബ്ദുൾ മോമിൻ പിയർന്റെ കയ്യിൽനിന്നും രണ്ട് കിലോ മയക്കുമരുന്ന് പിടിച്ചെടുത്തു. ജമ്മു കശ്മീരിലും മറ്റ് രാജ്യങ്ങളിലും ഹെറോയിൻ ഉൾപ്പടെയുള്ള മയക്കുമരുന്നുകൾ കടത്തുന്നതിൽ അബ്ദുൾ മോമിൻ പിയർ, സലീം ആൻഡ്രാബി എന്നിവരുൾപ്പെടെയുള്ളവർ ഉൾപ്പെട്ടിട്ടുണ്ടെന്ന് എൻഐഎ അന്വേഷണത്തിൽ വ്യക്തമായി. ഹെറോയിൻ വിൽപ്പനയിലൂടെ ലഭിക്കുന്ന പണം കൂടുതലും തീവ്രവാദ പ്രവർത്തനങ്ങൾക്ക് വേണ്ടി ഉപയോഗിച്ചതായി എൻഐഎ അറിയിച്ചു.