മഴ ജയിച്ചു കളി തോറ്റു

നോട്ടിങ്ങാം: ലോകകപ്പില്‍ ഇന്ന് നടക്കേണ്ട ഇന്ത്യ ന്യൂസിലാൻഡ് മത്സരത്തിൽ മഴ ജയിച്ചു. ടോസ് ഇടാൻ പോലും സമ്മതിക്കാതെ മഴ കളിച്ചപ്പോൾ അമ്പയർമാർ ഇന്ത്യ-കീവീസ് ഉപേക്ഷിക്കുകയായിരുന്നു. ഇതോടെ ഇരുടീമുകൾക്കും ഓരോ പോയിന്‍റ് വീതം ലഭിച്ചു. നോട്ടിങ്ങാമിലെ ട്രെന്‍റ് ബ്രിഡ്ജ് സ്റ്റേഡിയത്തില്‍ മഴ ഒഴിയാതിരുന്നതോടെ ഒരൊറ്റ പന്ത് പോലും എറിയാതെയാണ് മത്സരം ഉപേക്ഷിച്ചത്.

ഈ ലോകകപ്പില്‍ മഴ മൂലം ഉപേക്ഷിച്ച നാലാം മത്സരമാണിത്. ഇതിനുമുൻപ് നടന്ന ഒരു ലോകകപ്പിലും ഇത്രയും മത്സരങ്ങള്‍ ഉപേക്ഷിച്ച ചരിത്രമില്ല. മത്സരങ്ങൾ മുടങ്ങുന്നത് പതിവായതോടെ സെമിഫൈനലിസ്റ്റുകളേയും ഫൈനലിസ്റ്റുകളേയും തീരുമാനിക്കുന്നതിൽ പ്രതിസന്ധി ഉടലെടുക്കാൻ സാധ്യതയുണ്ട്.

മത്സരം ഉപേക്ഷിച്ചതോടെ ഈ ലോകകപ്പിൽ ആരോടും തോൽക്കാത്തവരെന്ന പരിവേഷം ഇന്ത്യയും ന്യൂസീലന്‍ഡും നിലനിർത്താനായി. ആദ്യത്തെ മൂന്നു കളികളും ജയിച്ച ന്യൂസീലൻഡ് ഏഴു പോയിന്‍റുമായി ഒന്നാം സ്ഥാനം നിലനിർത്തിയപ്പോൾ, ഇന്ത്യ മൂന്നു കളികളിൽനിന്നും അഞ്ചു പോയിന്‍റുമായി മൂന്നാം സ്ഥാനത്തേക്കു കയറി.