ഒന്നര പതിറ്റാണ്ടായി ഒരു രൂപയ്ക്ക് ഇഡ്ഡലി വിൽക്കുന്ന ഇഡ്ഡലി അമ്മൂമ്മ

കോയമ്പത്തൂര്‍: നല്ല ഭക്ഷണം വിളമ്പുക എന്നതുപോലെ പാവങ്ങളുടെ വിശപ്പടക്കാൻ കഴിയുന്നതും വലിയ കാര്യമാണ്. കോയമ്പത്തൂരിലെ ഇഡ്ഡലി അമ്മൂമ്മയും ചെയ്യുന്നത് ഇതേ കാര്യമാണ്. വര്‍ഷങ്ങളായി ഒരു രൂപയ്ക്ക് സ്വാദിഷ്ടവും വൃത്തിയുമുള്ള ഇഡ്ഡലി വില്‍ക്കുകയാണ് എം. കമ്മലത്താള്‍ എന്ന ഇഡ്ഡലി അമ്മൂമ്മ. പതിനഞ്ച് വര്‍ഷമായി അമ്മൂമ്മ ഈ വിലയ്ക്ക് തന്നെയാണ് ഇഡ്ഡലി വില്‍ക്കുന്നത്. ഈയിടയ്ക്ക് ഇതോടൊപ്പം ചെറിയ രീതിയില്‍ ബോണ്ടയുടെ വില്‍പ്പനയും ആരംഭിച്ചിട്ടുണ്ട് . രണ്ടര രൂപയാണ് ബോണ്ടയുടെ വില.

എന്നും രാവിലെ അഞ്ച് മണിക്ക് എണീറ്റ് ആട്ടുകല്ലില്‍ അരച്ചെടുത്ത ഇഡ്ഡലി മാവ് കൊണ്ട് ഇഡ്ഡലിയും പിന്നെ അതിനൊത്തൊരു ചട്‌നിയും തയ്യാറാക്കും. ആറ് മണിക്ക് ആരംഭിക്കുന്ന കച്ചവടം മാവ് തീരുന്നത് വരെ നീളും. എത്ര ഇഡ്ഡലി ഉണ്ടാക്കുന്നുവെന്ന് അമ്മൂമ്മയ്ക്ക് അറിയില്ല. എട്ടു കിലോ അരിയാണ് ദിവസവും ഉപയോഗിക്കുന്നതെന്ന് മാത്രം അറിയാം. 84 വയസ്സായെങ്കിലും എല്ലാ പണിയും തനിയെ ചെയ്താലേ അമ്മൂമ്മയ്ക്ക് തൃപ്തിയുള്ളു.

സാധാരണ ഇഡ്ഡലി പാത്രത്തില്‍ തയ്യാറാക്കുന്ന ഈ ഇഡ്ഡലിക്കൊപ്പം സ്‌നേഹവും വിളമ്പുന്ന അമ്മൂമ്മയ്ക്ക് ഇതെല്ലാം സന്തോഷം. ഇപ്പോഴും ഗ്യാസ് ഉപയോഗിക്കാന്‍ അറിയില്ലെന്നാണ് അമ്മൂമ്മ പറയുന്നത്. അതിനാൽ വിറകടുപ്പിലാണ് പാചകം. പാവങ്ങള്‍ക്ക് ഒരു നേരത്തെ ഭക്ഷണമെങ്കിലും തന്നെ കൊണ്ട് വിലകുറച്ച് നല്‍കാനാവുന്നുണ്ടല്ലോ എന്ന് തൃപ്തി മാത്രമാണ് ഈ അമ്മൂമ്മയ്ക്ക്.