ശ്രദ്ധ കൊലക്കേസിൽ ഡിഎൻഎ ഫലം പുറത്ത് കൊല്ലപ്പെട്ടത് ശ്രദ്ധ തന്നെയാണെന്ന് സ്ഥിരീകരിച്ചു

ദില്ലി : ശ്രദ്ധ വാൽക്കർ കൊലപാതക കേസിൽ ഡിഎൻഎ ഫലം പുറത്തുവന്നു. തെളിവെടുപ്പിനിടെ കണ്ടെത്തിയ മൃതദേഹഭാഗങ്ങൾ ശ്രദ്ധയുടേതാണെന്ന് ഡിഎൻഎ ഫലത്തിൽ നിന്നും വ്യക്തമായി. ഇതോടെ ശ്രദ്ധ കൊല്ലപ്പെട്ടതായി സ്ഥിരീകരിച്ചു. ഡൽഹിയിലെ മെഹരൗളി വനമേഖലയിൽ നിന്നും കണ്ടെടുത്ത മൃതദേഹഭാഗങ്ങളാണ് ശ്രദ്ധയുടേത് തന്നെയെന്ന് തിരിച്ചറിഞ്ഞത്

കൊലപ്പെടുത്തിയ ശേഷം ശ്രദ്ധയെ 35 കഷ്ണങ്ങളാക്കി വെട്ടിനുറുക്കി ഡൽഹിയിലെ വിവിധ ഭാഗങ്ങളിൽ കൊണ്ടിട്ടെന്നാണ് പ്രതി അഫ്താബ് പൂനാവല പോലീസിന് നൽകിയ മൊഴി. അഫ്താബുമായി നടത്തിയ തെളിവെടുപ്പിൽ 13 ശരീരഭാഗങ്ങൾ മാത്രമാണ് കണ്ടെടുക്കാൻ കഴിഞ്ഞത്. ഇത് ശ്രദ്ധയുടേതാണോയെന്ന കാര്യത്തിൽ ശാസ്ത്രീയ സ്ഥിരീകരണത്തിന് വേണ്ടിയാണ് ഡിഎൻഎ പരിശോധന നടത്തിയത്. ഇതിനായി നേരത്തെ ശ്രദ്ധയുടെ പിതാവിന്റെ സാമ്പിൾ ശേഖരിച്ചിരുന്നു. സെൻട്രൽ ഫോറൻസിക് സയൻസ് ലബോറട്ടറിയിലായിരുന്നു ഡിഎൻഎ പരിശോധന. സമാന രീതിയിൽ മറ്റ് പലരെയും അഫ്താബ് കൊലപ്പെടുത്തിയതായി പോലീസിന് സംശയിച്ചിരുന്നു. ഈ സാഹചര്യത്തിൽ കൂടിയാണ് ഡിഎൻഎ പരിശോധന നടത്തിയത്.

കഴിഞ്ഞ മാസമായിരുന്നു ശ്രദ്ധയുടെ കൊലപാതകം സംബന്ധിച്ച ഞെട്ടിക്കുന്ന വിവരം പുറം ലോകമറിഞ്ഞത് .ശ്രദ്ധയെ കാണാതായതിനെ തുടർന്ന് മാതാപിതാക്കൾ പോലീസിൽ പരാതി നൽകി. തുടന്നുള്ള അന്വേഷണത്തിലാണ് ഞെട്ടിക്കുന്ന കൊലപാതക വിവരം പുറത്തുവന്നത്.