സ്വാതന്ത്ര്യദിനാഘോഷം: കോൺഗ്രസ് ഭരിക്കുന്ന കർണാടകയിലും, തെലങ്കാനയിലും, ഹിമാചലിലും വന്ദേമാതരം പൂർണമായി ആലപിച്ചു! കേരളത്തിൽ ഒഴിവാക്കിയ നടപടിക്കെതിരെ വ്യാപക പ്രതിഷേധം

ദില്ലി : സ്വാതന്ത്ര്യദിനാഘോഷത്തില്‍ വന്ദേമാതരം പൂര്‍ണമായി ആലപിച്ച് കോണ്‍ഗ്രസ് ഭരിക്കുന്ന കര്‍ണാടക ഹിമാചല്‍പ്രദേശ് തെലങ്കാന സർക്കാരുകൾ. കര്‍ണാടകയില്‍ മുഖ്യമന്ത്രി ഡികെ ശിവകുമാറിന്റെ സാന്നിധ്യത്തിലാണ് വന്ദേമാതരം പൂര്‍ണമായും ആലപിച്ചത്. ഹൈദരബാദിൽ രേവന്ദ് റെഡ്ഢിയുടെയും ഹിമാചൽ പ്രദേശിൽ സുഖ്വീന്ദർ സിങ് സുഖുവിൻ്റെയും സ്വാതന്ത്ര്യ ദിനാഘോഷപരിപാടികളിൽ വന്ദേമാതരം മുഴുവൻ പാടി. എന്നാൽ തമിഴ്നാട് സർക്കാരിൻറെ സ്വാതന്ത്ര്യദിനാഘോഷ ചടങ്ങിൽ വന്ദേ മാതരം പൂർണമായി ഒഴിവാക്കി. മുഖ്യമന്ത്രി ജോസഫ് വിജയ് പതാക ഉയർത്തുന്ന സമയം ദേശീയ ഗാനം മാത്രമാണ് ആലപിച്ചത്.

ദില്ലിയിലെ എ.ഐ.സി.സി. ആസ്ഥാനത്ത് നടന്ന ചടങ്ങിൽ വന്ദേമാതരം മുഴുവനായി പാടി. മുതിർന്ന കോൺഗ്രസ് നേതാവ് സോണിയ ഗാന്ധിയും കോൺഗ്രസ് അദ്ധ്യക്ഷൻ മല്ലികാർജുൻ ഖർഗെയും ഇടയ്ക്കുകയറി തടസപ്പെടുത്താൻ നോക്കിയെങ്കിലും ഗാനം നിർത്തിയില്ല. വന്ദേമാതരം ബിൽ പാർലമെന്റിൽ വന്നപ്പോൾ അതിനെതിരേ ശക്തമായി നിലകൊണ്ട പാർട്ടിയായിരുന്നു കോൺഗ്രസ്. രാജ്യത്ത് കൂടുതൽ വിഭജനം സൃഷ്ടിക്കാൻ വന്ദേമാതരം ബിൽ കാരണമാകുമെന്നായിരുന്നു കോൺഗ്രസ് നിലപാട്.

അതേസമയം കേരളത്തില്‍ സ്വാതന്ത്ര്യദിനാഘോഷ പരിപാടിയില്‍ നിന്നും വന്ദേമാതരം സംസ്ഥാന സര്‍ക്കാര്‍ ഒഴിവാക്കിയിരുന്നു. ദേശീയഗാനം മാത്രമാണ് മുഖ്യമന്ത്രിയുടെ പരിപാടിയില്‍ ആലപിച്ചത്. അതിനിടെ കേന്ദ്രസര്‍ക്കാര്‍ നിര്‍ദേശം പാലിച്ച് കൊണ്ട് വഴുതക്കാട് വനം വകുപ്പ് ആസ്ഥാനത്ത് വന്ദേമാതരം പൂർണമായി ആലപിച്ചു. APCCF നിര്‍ദേശ പ്രകാരമാണ് ആലപിച്ചതെന്ന് എസ്റ്റേറ്റ് വിഭാഗം നല്‍കിയ വിശദീകരണം.