ലോക ബോക്സിംഗ് ചാമ്പ്യൻഷിപ്പിൽ ഭാരതത്തിന് ചരിത്ര നേട്ടം ! 4 മെഡലുകളുമായി പോയിന്റ് പട്ടികയിൽ മൂന്നാം സ്ഥാനത്ത്

ലണ്ടൻ:2025-ലെ ലോക ബോക്സിംഗ് ചാമ്പ്യൻഷിപ്പിൽ ചരിത്രത്തിലെ ഏറ്റവും മികച്ച പ്രകടനവുമായി ഭാരതം. രണ്ട് സ്വർണം, ഒരു വെള്ളി, ഒരു വെങ്കലം എന്നിവ ഉൾപ്പെടെ നാല് മെഡലുകളാണ് ഇന്ത്യൻ ടീം നേടിയത്. 4 മെഡലുകളും നേടിയത് വനിതാ താരങ്ങളാണ്.

വനിതകളുടെ 57 കിലോ വിഭാഗത്തിൽ ജൈസ്മിൻ ലംബോറിയയും 48 കിലോ വിഭാഗത്തിൽ മീനാക്ഷി ഹൂഡയും സ്വർണ മെഡൽ നേടിയപ്പോൾ 80 കിലോ വിഭാഗത്തിൽ നൂപുർ ഷിയോറാൻ വെള്ളി മെഡലും 80 കിലോ വിഭാഗത്തിൽ പൂജ റാണി വെങ്കലവും നേടി.

പാരീസ് ഒളിമ്പിക്സിലെ മോശം പ്രകടനത്തിന് ശേഷം ഒരു വർഷം നീണ്ട കഠിനാധ്വാനത്തിന്റെ ഫലമായാണ് ജൈസ്മിൻ ലംബോറിയയുടെ ഈ സ്വർണ്ണ നേട്ടം. 57 കിലോ വിഭാഗം ഫൈനലിൽ പോളണ്ടിന്റെ പ്രമുഖ താരവും പാരീസ് ഒളിമ്പിക്സിലെ വെള്ളി മെഡൽ ജേതാവുമായ ജൂലിയ സെറമേറ്റയെയാണ് ജൈസ്മിൻ നേരിട്ടത്. ആദ്യ റൗണ്ടിൽ പിന്നോട്ട് പോയ ശേഷം, തന്റെ നീളവും തന്ത്രപരമായ നീക്കങ്ങളും ഉപയോഗിച്ച് ജൈസ്മിൻ ശക്തമായ തിരിച്ചുവരവ് നടത്തി. ഒടുവിൽ 4-1 എന്ന സ്കോറിനാണ് ജൈസ്മിൻ വിജയം നേടിയത്.

വനിതകളുടെ 48 കിലോ വിഭാഗം ഫൈനലിൽ, മൂന്ന് തവണ ലോക ചാമ്പ്യനും ഒളിമ്പിക്സ് വെങ്കല മെഡൽ ജേതാവുമായ കസാക്കിസ്ഥാന്റെ നസീം ക്വിസൈബായിയെയാണ് മീനാക്ഷി ഹൂഡ പരാജയപ്പെടുത്തിയത്. ഏതാനും മാസങ്ങൾക്ക് മുൻപ് ലോകകപ്പ് ഫൈനലിൽ നസീം ക്വിസൈബായിയോട് ഏറ്റ തോൽവിക്ക് മീനാക്ഷി ഈ വിജയത്തിലൂടെ പകരം വീട്ടി.