പ്രതിരോധ മേഖലയിൽ ചരിത്രക്കുതിപ്പിനൊരുങ്ങി ഭാരതം! 1 ലക്ഷം കോടിയുടെ ആയുധമിടപാടുകൾക്ക് ഡിഫൻസ് അക്വിസിഷൻ കൗൺസിൽ അംഗീകാരം നൽകിയേക്കും

ദില്ലി : ഭാരതീയ സായുധ സേനകളുടെ യുദ്ധശേഷിയും ആധുനികവൽക്കരണവും ലക്ഷ്യമിട്ട് ഒരു ലക്ഷം കോടിയിലധികം രൂപയുടെ പ്രതിരോധ സംഭരണ പദ്ധതികൾക്ക് അംഗീകാരം നൽകാനൊരുങ്ങി കേന്ദ്രപ്രതിരോധ മന്ത്രാലയം. പ്രതിരോധ മന്ത്രി രാജ്‌നാഥ് സിങ്ങിന്റെ അദ്ധ്യക്ഷതയിൽ ഇന്ന് ദില്ലിയിൽ ചേരുന്ന ഡിഫൻസ് അക്വിസിഷൻ കൗൺസിൽ (ഡിഎസി) യോഗത്തിൽ ഇതുസംബന്ധിച്ച അന്തിമ തീരുമാനമുണ്ടാകും. അതിർത്തികളിലെ വർദ്ധിച്ചുവരുന്ന സുരക്ഷാ വെല്ലുവിളികളുടെ പശ്ചാത്തലത്തിൽ കരസേനയുടെ പ്രതിരോധ നിര ശക്തമാക്കുന്നതിനാണ് ഈ വൻകിട പദ്ധതിയിലൂടെ മുൻഗണന നൽകുന്നത്. വ്യോമ പ്രതിരോധം, അതിവേഗ സൈനിക വിന്യാസ ശേഷി, ആയുധങ്ങളുടെ ദീർഘദൂര കൃത്യത എന്നിവ വർദ്ധിപ്പിക്കുന്നതിനുള്ള നിർണായക നിർദ്ദേശങ്ങളാണ് കൗൺസിലിന്റെ പരിഗണനയിലുള്ളത്.

ഇന്ത്യൻ പ്രതിരോധ രംഗത്തെ തദ്ദേശീയവൽക്കരണത്തിന് ഊർജ്ജം പകർന്നുകൊണ്ട്, ആഭ്യന്തരമായി നിർമ്മിച്ച കെ-9 വജ്ര സെൽഫ് പ്രൊപ്പൽഡ് ആർട്ടിലറി ഗണ്ണുകൾ അധികമായി വാങ്ങുന്നതിനുള്ള നിർദ്ദേശം ഈ യോഗത്തിലെ പ്രധാന അജണ്ടയാണ്. ലഡാക്കിലെ അതിശൈത്യമുള്ള ഉയർന്ന മലനിരകളിലും പടിഞ്ഞാറൻ അതിർത്തിയിലെ കടുത്ത മരുഭൂമികളിലും ഒരുപോലെ മികച്ച പ്രകടനം കാഴ്ചവെക്കാൻ ശേഷിയുണ്ടെന്ന് തെളിയിച്ചിട്ടുള്ള 155 എംഎം ട്രാക്ക്ഡ് ഹോവിറ്റ്സറുകളാണ് ഇവ. ഇതിനൊപ്പം ശത്രുക്കളുടെ താവളങ്ങളും പ്രതിരോധ കോട്ടകളും കൃത്യതയോടെ കണ്ടെത്തി സ്വയം തകരാൻ ശേഷിയുള്ള ലോയിറ്ററിങ് മ്യൂണിഷനുകൾ അഥവാ ‘കാമികാസെ ഡ്രോണുകൾ’ വൻതോതിൽ വാങ്ങാനുള്ള പദ്ധതിയും കൗൺസിൽ വിശദമായി പരിശോധിക്കും.

ആധുനിക യുദ്ധമുറകളിൽ വ്യോമാതിർത്തികളിൽ നിന്നുള്ള ഭീഷണികൾ നേരിടുന്നതിനായി, കുറഞ്ഞ ഉയരത്തിൽ പറക്കുന്ന വിമാനങ്ങളെയും ഹെലികോപ്റ്ററുകളെയും ശത്രു ഡ്രോണുകളെയും തകർക്കാൻ ശേഷിയുള്ള വെർബ മാൻ-പോർട്ടബിൾ എയർ ഡിഫൻസ് സിസ്റ്റങ്ങൾ വാങ്ങാനും മന്ത്രാലയത്തിന് പദ്ധതിയുണ്ട്. കൂടാതെ ഇന്ത്യൻ സേനയുടെ ടാങ്കുകളുടെയും കവചിത വാഹനങ്ങളുടെയും സുരക്ഷ കടുപ്പിക്കുന്നതിനായി ആക്റ്റീവ് പ്രൊട്ടക്ഷൻ സിസ്റ്റം ഘടിപ്പിക്കാനുള്ള നിർദ്ദേശവും വെള്ളിയാഴ്ചത്തെ യോഗത്തിന്റെ പരിഗണനയ്ക്ക് വരും. അത്യാധുനിക സെൻസറുകൾ ഉപയോഗിച്ച് ശത്രുക്കളുടെ മിസൈലുകളെയും റോക്കറ്റ് ആക്രമണങ്ങളെയും അന്തരീക്ഷത്തിൽ വെച്ച് തന്നെ മുൻകൂട്ടി കണ്ടെത്തി നശിപ്പിക്കാൻ ഈ സംവിധാനത്തിലൂടെ സൈന്യത്തിന് സാധിക്കും. ഈ പദ്ധതികൾക്ക് ഡിഎസിയുടെ അംഗീകാരം ലഭിക്കുന്നതോടെ ഭാവിയിലെ സുരക്ഷാ വെല്ലുവിളികളെ നേരിടാൻ ഇന്ത്യൻ സൈന്യം കൂടുതൽ സജ്ജമാകുമെന്നാണ് വിലയിരുത്തപ്പെടുന്നത്.