മെട്രോ യാത്രയ്ക്കിടെ ടിക്കറ്റ് വാങ്ങാൻ പണമില്ല, പ്രധാനമന്ത്രി മോദി സ്വന്തം കാർഡ് ഉപയോഗിച്ച് ടിക്കറ്റെടുത്തു: ഡി.കെ. ശിവകുമാർ

ബെംഗളൂരുവിലെ പുതുതായി ഉദ്ഘാടനം ചെയ്ത പിങ്ക് ലൈൻ മെട്രോയിൽ പ്രധാനമന്ത്രി നരേന്ദ്ര മോദിക്കൊപ്പം നടത്തിയ യാത്രയ്ക്കിടെയുണ്ടായ രസകരമായ അനുഭവം പങ്കുവെച്ച് കർണാടക ഉപമുഖ്യമന്ത്രി ഡി.കെ. ശിവകുമാർ. യാത്രയ്ക്കിടെ ടിക്കറ്റ് വാങ്ങാൻ തന്റെ കൈവശം പണമില്ലായിരുന്നുവെന്നും പ്രധാനമന്ത്രി മോദി സ്വന്തം കാർഡ് ഉപയോഗിച്ച് തനിക്കുവേണ്ടിയും ടിക്കറ്റ് എടുത്തുനൽകിയെന്നും ശിവകുമാർ പറഞ്ഞു.

പ്രധാനമന്ത്രിയുമായുള്ള ബന്ധം പരസ്പര ബഹുമാനത്തിലും വ്യക്തിപരമായ ആദരവിലുമാണ് അധിഷ്ഠിതമെന്നും ശിവകുമാർ വ്യക്തമാക്കി. രാഷ്ട്രീയവും വികസനവും രണ്ടായി കാണണമെന്നും തിരഞ്ഞെടുപ്പ് സമയത്താണ് രാഷ്ട്രീയം നടത്തേണ്ടതെന്നും അദ്ദേഹം പറഞ്ഞു. ബെംഗളൂരു സന്ദർശനത്തിനിടെ മുൻകൂട്ടി തീരുമാനിക്കാതെ ശിവകുമാർ നടത്തിയ പ്രധാനമന്ത്രിയുമായുള്ള സ്വകാര്യ കൂടിക്കാഴ്ച വലിയ ചർച്ചകൾക്ക് വഴിയൊരുക്കിയിരിക്കുകയാണ്.. രാജ്യത്തിന്റെ താൽപര്യത്തിനും വികസനത്തിനുമായി കേന്ദ്രവും സംസ്ഥാനങ്ങളും ഒരുമിച്ച് പ്രവർത്തിക്കേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി.