ആരാധകരെ ശാന്തരാകുവിൻ !!ഇന്ത്യൻ ഫുട്ബോൾ ടീം ഏഷ്യൻ ഗെയിംസിനായി ചൈനയിലേക്ക് പറക്കും; അനുമതി നൽകി കേന്ദ്ര സർക്കാർ

ദില്ലി : ഇന്ത്യൻ ഫുട്ബാൾ ആരാധകർക്ക് സന്തോഷവാർത്ത. ഏഷ്യൻ ഗെയിംസ് ഫുട്ബോളിൽ ഇന്ത്യയുടെ പുരുഷ, വനിതാ ടീമുകൾ ചൈനയിലേക്കു പോകുമെന്ന് കേന്ദ്ര മന്ത്രി അനുരാഗ് ഠാക്കൂർ ട്വിറ്ററിലൂടെ അറിയിച്ചു. ഇതിനായി നിലവിലെ മാനദണ്ഡങ്ങളിൽ ഇളവു നൽകാൻ കായിക മന്ത്രാലയവും കേന്ദ്ര സർക്കാരും തീരുമാനിച്ചതായും അനുരാഗ് ഠാക്കൂർ പറഞ്ഞു. നേരത്തെ ഇന്ത്യയിൽ നടന്ന ഇന്റർ കോണ്ടിനെന്റൽ കപ്പിലും സാഫ് കപ്പിലും ഇന്ത്യ കിരീടം നേടിയിരുന്നു.

ഫിഫ റാങ്കിങ് പട്ടികയിൽ വർഷങ്ങൾക്കു ശേഷം ആദ്യ നൂറിൽ ഇടം പിടിക്കാനും ഇന്ത്യൻ പുരുഷ ഫുട്ബോൾ ടീമിനു സാധിച്ചിരുന്നു. ഏഷ്യൻ ഗെയിംസിൽ രാജ്യത്തിന് അഭിമാനിക്കാവുന്ന നേട്ടങ്ങളിലെത്താൻ ഫുട്ബോൾ ടീമിന് സാധിക്കട്ടെയെന്ന് കേന്ദ്രമന്ത്രി ആശംസിച്ചു.

ഏഷ്യൻ റാങ്കിങ്ങിൽ മുന്നിലുള്ള ഇനങ്ങളിൽ മാത്രം മത്സരിച്ചാൽ മതിയെന്നായിരുന്നു ആദ്യം തീരുമാനിച്ചിരുന്നത്. ഇതോടെ ഇന്ത്യൻ പുരുഷ, വനിതാ ഫുട്ബോൾ ടീമുകൾക്ക് ചൈനയിൽ നടക്കുന്ന ഏഷ്യൻ ഗെയിംസിൽ പങ്കെടുക്കാനുള്ള വാതിലടഞ്ഞു. ഇതിനിടെയാണ് കേന്ദ്രസർക്കാർ ടീമിന് അനുവാദം നൽകിയത്.