22500 കോടിയുടെ വമ്പൻ പദ്ധതിയുമായി ഇന്ത്യൻ റെയിൽവേ; 100 പാതകളിൽ സ്വകാര്യ ട്രെയിനുകൾ ഓടും

ദില്ലി: റെയിൽവേയിൽ വിപ്ലവാത്മക മാറ്റത്തിനൊരുങ്ങി കേന്ദ്ര സർക്കാർ. 100 റൂട്ടുകളിൽ 150 സ്വകാര്യ ട്രെയിനുകൾ ഓടിക്കാനാണ് കേന്ദ്ര റെയിൽവേ മന്ത്രാലയവും നീതി ആയോഗും ചേർന്ന് തയ്യാറാക്കുന്ന പദ്ധതി. 22500 കോടിയുടേതാണ് പദ്ധതി. മുംബൈ സെൻട്രൽ – ദില്ലി, ദില്ലി – പട്ന, അലഹബാദ് – പുണെ, ദാദർ – വഡോദര തുടങ്ങിയ നൂറോളം റൂട്ടുകളിൽ സ്വകാര്യ ട്രെയിനുകൾ ഓടിക്കാനാണ് പദ്ധതി. ഹൗറാ – ചെന്നൈ, ഹൗറ – പട്ന, ഇൻഡോർ – ഒഖ്ല, ലക്നൗ – ജമ്മു താവി, ചെന്നൈ -ഒഖ്ല, ആനന്ത് വിഹാർ – ഭഗൽപുർ, സെക്കന്ദ്രബാദ് – ഗുവാഹത്തി, ഹൗറ – ആനന്ത് വിഹാർ എന്നീ റൂട്ടുകളിലും സ്വകാര്യ ട്രെയിനുകൾ ഓടിക്കാൻ ആലോചിക്കുന്നുണ്ട്.

തത്പരകക്ഷികൾക്ക് അഭിപ്രായം രേഖപ്പെടുത്താനുള്ള ഡിസ്കഷൻ പേപ്പറാണ് ഇപ്പോൾ പുറത്തുവിട്ടിരിക്കുന്നത്. ഇതിൽ 100 റൂട്ടുകൾ 10-12 ക്ലസ്റ്ററുകൾ ആയി തിരിച്ചിരിക്കുന്നു. സ്റ്റേഷനുകളിൽ നിർത്തുന്ന സമയം, നിരക്ക്, കോച്ചുകൾ നിശ്ചയിക്കുന്നത് തുടങ്ങിയ കാര്യങ്ങൾ സ്വകാര്യ ട്രെയിൻ ഉടമകൾക്ക് തീരുമാനം എടുക്കാനാവും. നൂതന സാങ്കേതിക വിദ്യയും ലോകോത്തര സേവനവും ലഭ്യമാക്കാൻ ഇതിലൂടെ സാധിക്കുമെന്നാണ് മന്ത്രാലയവും നീതി ആയോഗും ഉറപ്പുപറയുന്നത്.