ഇറാനെ സാമ്പത്തികമായി തളർത്തും!! കരവഴിയുള്ള ഉപരോധത്തിന് അമേരിക്കയും ഇസ്രയേലും; നിർണായക ചർച്ചകൾ നടന്നെന്ന് റിപ്പോർട്ട്

വാഷിങ്‌ടൺ: ഇറാനെ സാമ്പത്തികമായി പൂർണ്ണമായും തളർത്തുന്നതിനായി പുതിയ തന്ത്രങ്ങളുമായി അമേരിക്കയും ഇസ്രയേലും. ഹോർമുസ് കടലിടുക്ക് വഴിയുള്ള നാവിക ഉപരോധത്തിന് പുറമെ ഇറാനെതിരെ കരമാർഗ്ഗം ഉപരോധം ഏർപ്പെടുത്തുന്നതിനെക്കുറിച്ച് ഇരുരാജ്യങ്ങളും ആലോചിക്കുന്നതായി അന്താരാഷ്ട്ര മാധ്യമമായ ‘ദി ടെലിഗ്രാഫ്’ റിപ്പോർട്ട് ചെയ്തു. വാഷിംഗ്ടണിൽ വെച്ച് യുഎസ് പ്രസിഡന്റ് ഡൊണാൾഡ് ട്രമ്പും ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവും നടത്തിയ ഉന്നതതല കൂടിക്കാഴ്ചയിലാണ് ഇത് സംബന്ധിച്ച് ചർച്ചകൾ നടന്നത്.

ഇറാനിലേക്കുള്ള കയറ്റുമതിയും ഇറക്കുമതിയും പൂർണ്ണമായി തടയുന്നതിലൂടെ രാജ്യത്തെ കടുത്ത സാമ്പത്തിക പ്രതിസന്ധിയിലേക്ക് തള്ളിയിടുകയാണ് ഈ പദ്ധതിയുടെ പ്രധാന ലക്ഷ്യം. എന്നാൽ ഇത് പ്രായോഗികമാക്കണമെങ്കിൽ ഇറാഖ്, തുർക്കി, പാകിസ്ഥാൻ, അഫ്ഗാനിസ്ഥാൻ, തുർക്കിമെനിസ്ഥാൻ, അർമേനിയ, അസർബെയ്ജാൻ തുടങ്ങിയ ഇറാന്റെ അയൽരാജ്യങ്ങളുടെ പിന്തുണ അത്യന്താപേക്ഷിതമാണ്.

അതേസമയം, ഇറാനിൽ നിന്നുള്ള തിരിച്ചടി ഭയന്ന് ഈ അയൽരാജ്യങ്ങൾ ചരക്ക് നീക്കം പൂർണ്ണമായി തടയാൻ തയ്യാറാകുമോ എന്ന ചോദ്യവും ഉയരുന്നുണ്ട്. പദ്ധതി പ്രായോഗികമായി നടപ്പിലാക്കാൻ വെല്ലുവിളികൾ ഏറെയാണെങ്കിലും ഇറാന്റെ സാമ്പത്തിക അടിത്തറ തകർക്കാൻ കര ഉപരോധം വളരെ ഫലപ്രദമാണെന്നാണ് മുൻ യുഎസ് സൈനിക ഉദ്യോഗസ്ഥർ വിലയിരുത്തുന്നത്. ഇറാനിൽ നിന്നുള്ള സുരക്ഷാ ഭീഷണികൾ പൂർണ്ണമായി അവസാനിച്ചിട്ടില്ലെന്നും, പ്രതിരോധ നടപടികളുടെ ഭാഗമായി സൈനിക-സൈനികേതര മാർഗ്ഗങ്ങൾ തുടരുമെന്നും മുതിർന്ന ഇസ്രയേൽ ഉദ്യോഗസ്ഥർ വ്യക്തമാക്കി.