“ഇസ്രയേൽ ആദ്യ ലക്ഷ്യം മാത്രം !ലോകം മുഴുവൻ ഇസ്‌ലാമിന്റെ കീഴിൽ കൊണ്ടു വരും” ; ഭീഷണിയുമായി ഹമാസ് കമാൻഡർ മഹ്‌മൂദ് അൽ സഹർ

ഗാസ: ഇസ്രയേല്‍ തങ്ങളുടെ ആദ്യ ലക്ഷ്യം മാത്രമാണെന്നും ലോകം മുഴുവൻ ഇസ്‌ലാമിന് കീഴിൽ കൊണ്ട് വരുമെന്നുമുള്ള ഭീഷണിയുമായി ഹമാസ് കമാൻഡർ മഹ്‌മൂദ് അൽ സഹർ രംഗത്ത്. അതിർത്തി തകർത്ത് നുഴഞ്ഞു കയറി ഹമാസ് തീവ്രവാദികൾ നടത്തിയ മനുഷ്യക്കുരിതിക്കുള്ള ഇസ്രയേലിന്റെ പ്രത്യാക്രമണം കരയുദ്ധത്തിന് വക്കിൽ എത്തി നിൽക്കുമ്പോഴാണ് ഭീഷണി വീഡിയോയുമായി മഹ്‌മൂദ് അൽ സഹർ രംഗത്ത് വന്നത്. പലസ്തീൻ ജനതയ്ക്കും ലെബനൻ, സിറിയ, ഇറാഖ് തുടങ്ങിയ രാജ്യങ്ങൾക്കെതിരെയും തുടരുന്ന ആക്രമണങ്ങൾ അവസാനിക്കുമെന്നും സഹർ വീഡിയോ സന്ദേശത്തിൽ പറയുന്നു.

ഹമാസിന്റെ സായുധവിഭാഗമായ അൽ കസം ബ്രിഗേഡ്‌സിന്റെ തലവനായ മുഹമ്മദ് ദെയ്ഫാണ് ആക്രമണത്തിന്റെ ആസൂത്രകനെന്നാണ് കരുതപ്പെടുന്നത്. തീവ്രവാദി ആക്രമണത്തിന് പിന്നാലെ ദെയ്ഫിന്റെ ശബ്ദസന്ദേശം പ്രചരിച്ചിരുന്നു. ജറുസലേമിലെ അൽ അഖ്‌സ പള്ളിയിൽ ഇസ്രയേൽ കടന്നുകയറിയതിനുള്ള തിരിച്ചടിയാണെന്ന് അതിൽ ദെയ്ഫ് സൂചിപ്പിച്ചു.

2021 മേയിലായിരുന്നു ഇസ്രയേൽ പോലീസും പട്ടാളവും അൽ അഖ്‌സയിൽ കടന്നത്. അന്ന് ഇസ്രയേലും ഹമാസും തമ്മിൽ നടത്തിയ യുദ്ധം 11 ദിവസമാണ് നീണ്ടത്. ഇയാളെ വധിക്കാൻ ഏഴുതവണ ഇസ്രയേൽ ശ്രമിച്ചു. ഏറ്റവുമൊടുവിലത്തെ വധശ്രമം 2021-ലായിരുന്നു. അതും അതിജീവിച്ചു. ദെയ്ഫ് ഒരിക്കലും പരസ്യമായി രംഗത്തുവന്നിട്ടില്ല. മൂന്ന് ചിത്രങ്ങൾ മാത്രമാണ് ദെയ്ഫിന്റേതായി പുറം ലോകത്ത് വന്നിട്ടുള്ളൂ. ഒന്ന് ഒരു നിഴൽച്ചിത്രം. മറ്റൊന്ന് കൗമാര കാലഘട്ടത്തിന്റെ അവസാന വർഷങ്ങളിലേതാണ്. വേറൊന്ന് മുഖംമറച്ചതും. ഇസ്രയേലിന്റെ വധശ്രമങ്ങളിൽ ദെയ്ഫിന്റെ ഒരു കണ്ണു നഷ്ടപ്പെട്ടെന്നും ഒരുകാലിന് ഗുരുതരമായി പരിക്കേറ്റെന്നും ഹമാസ് വൃത്തങ്ങൾ മുമ്പ് വെളിപ്പെടുത്തിയിരുന്നു.

ഇയാൾ എവിടെയാണെന്നത് ഇന്നും അജ്ഞാതമാണ്. ഗാസയിലെ ആയിരക്കണക്കിന് തുരങ്കങ്ങളിലൊന്നിൽ ഒളിച്ചിരിക്കുകയാവാമെന്നു കരുതുന്നത്. കഴിഞ്ഞ ദിവസം ഇസ്രയേലിന്റെ വ്യോമാക്രമണത്തിൽ ദെയ്ഫിന്റെ സഹോദരനും കുടുംബത്തിലെ രണ്ടുപേരും കൊല്ലപ്പെട്ടു. പിതാവിന്റെ വീടിനുനേരെ ഇസ്രയേൽ വ്യോമാക്രമണം നടത്തി. ഗാസയിൽ തുരങ്കങ്ങളുണ്ടാക്കുന്നതിനും ബോംബുകളുണ്ടാക്കുന്നതിനും ചുക്കാൻപിടിച്ചത് ദെയ്ഫാണ്. 2014-ൽ ഇസ്രയേൽ നടത്തിയ വ്യോമാക്രമണങ്ങളിൽ ഇയാളുടെ ഭാര്യയും ഏഴുമാസം പ്രായമുള്ള മകനും മൂന്നുവയസ്സുള്ള മകളും കൊല്ലപ്പെട്ടു.