അതിര്‍ത്തിയില്‍ സിആര്‍പിഎഫ് വാഹനവ്യൂഹത്തിന് നേരെ ഭീകരാക്രമണം; 18 ജവാന്മാര്‍ കൊല്ലപ്പെട്ടു; 40 സൈനികര്‍ക്ക് പരുക്ക്; 15 പേരുടെ നില ഗുരുതരമെന്നും റിപ്പോര്‍ട്ട്

ശ്രീനഗര്‍: ജമ്മുകശ്മീരില്‍ ഭീകരാക്രമണത്തില്‍ 18 ജവാന്മാര്‍ കൊല്ലപ്പെട്ടു. 40 സൈനികര്‍ക്ക് പരുക്കേറ്റു. പരുക്കേറ്റവരില്‍ 15 പേരുടെ നില ഗുരുതരമാണ് എന്നാണ് റിപ്പോര്‍ട്ട്. മരണസംഖ്യ ഇനിയും ഉയരുമെന്നാണ് സൂചന. ശ്രീനഗര്‍ ജമ്മു ഹൈവേയിലെ അവന്തിപ്പുരയ്ക്ക് അടുത്ത് ഗൊരിപുരയിലാണ് ആക്രമണം നടന്നത്.

ഇന്ന് വൈകുന്നേരം മൂന്നേകാലോടെ സിആര്‍പിഎഫ് വാഹനവ്യൂഹത്തിന് നേര്‍ക്കായിരുന്നു ആക്രമണം. അത്യുഗ്രശേഷിയുള്ള സ്ഫോടകവസ്തുക്കളാണ് ഉപയോഗിച്ചതെന്നാണ് വിവരം. രണ്ടായിരത്തിലധികം സൈനികരാണ് വാഹനത്തില്‍ ഉണ്ടായിരുന്നത്. ആക്രമണത്തിന്‍റെ ഉത്തരവാദിത്തം പാകിസ്താന്‍ ഭീകരസംഘടനയായ ജെയ്ഷെ മുഹമ്മദ് ഏറ്റെടുത്തു. പരുക്കേറ്റവരെ ശ്രീനഗറിലെ സൈനികആശുപത്രിയിലാണ് പ്രവേശിപ്പിച്ചിരിക്കുന്നത്.

സ്ഫോടനത്തിനു ശേഷം ഭീകരര്‍ വാഹനവ്യൂഹത്തിനു നേരെ വെടിയുതിര്‍ക്കുകയും ചെയ്തു. സ്ഫോടനത്തില്‍ തകര്‍ന്ന ബസില്‍ മുപ്പത്തിയഞ്ച് സൈനികരായിരുന്നു ഉണ്ടായിരുന്നത്. രക്ഷാപ്രവര്‍ത്തനം പുരോഗമിക്കുകയാണ്.

എഴുപത് വാഹനങ്ങളാണ് സൈനികരുടെ വാഹനവ്യൂഹത്തിലുണ്ടായിരുന്നത്. സംഭവത്തെ കുറിച്ച് ജമ്മു കശ്മീര്‍ പോലീസ് അന്വേഷണം ആരംഭിച്ചതായി സി ആര്‍ പി എഫ്ഐജി(ഓപ്പറേഷന്‍സ്) സുള്‍ഫിക്കര്‍ ഹസന്‍ അറിയിച്ചു.