കടകംപള്ളിയെ വേദിയിലിരുത്തി സർക്കാറിനെ വിമർശിച്ച് ജോസഫ് മാർത്തോമ്മ മെത്രാപ്പോലീത്ത : മറുപടി ഇല്ലാതെ കടകംപള്ളി

തിരുവനന്തപുരം: ശബരിമല വിഷയത്തില്‍ സംസ്ഥാന സര്‍ക്കാരിനെതിരെ രൂക്ഷ വിമർശനവുമായി മാര്‍ത്തോമ സുറിയാനി സഭാ അദ്ധ്യക്ഷന്‍ ഡോക്ടര്‍ ജോസഫ് മാര്‍ത്തോമ്മാ മെത്രാപ്പോലീത്താ. ശബരിമല മാനവീയതയുടെ ഐക്യത്തിനായുണ്ടായി ഉണ്ടായ ക്ഷേത്രമാണെന്നും ആളുകളെ കൊണ്ട് വന്ന് മതില്‍ പണിതാല്‍ നവോത്ഥാനം ഉണ്ടാകില്ലെന്നുമാണ് അദ്ദേഹം കുറ്റപ്പെടുത്തിയത് . ദേവസ്വം മന്ത്രി കടകംപള്ളി സുരേന്ദ്രനെ വേദിയിലിരുത്തിയായിരുന്നു ജോസഫ് മാര്‍ത്തോമ്മാ മെത്രാപ്പോലീത്തയുടെ രൂക്ഷ വിമര്‍ശനം. ജോസഫ് മാര്‍ ബര്‍ണബാസ് തിരുമേനിയുടെ സപ്തതി ആഘോഷ ഉത്ഘാടന ചടങ്ങിൽ പങ്കെടുക്കുകയായിരുന്നു ഇരുവരും.

ശബരിമല വിഷയത്തിലെ സംസ്ഥാന സര്‍ക്കാരിന്റെ നിലപാട് നേരത്തെ തന്നെ വിശ്വാസികള്‍ക്ക് എതിരായിരുന്നു. വിശ്വാസികളെ കൂടെ നിര്‍ത്തുന്നതില്‍ സര്‍ക്കാരിന് വീഴ്ച്ച പറ്റിയെന്നും ജോസഫ് മാര്‍ത്തോമ്മാ മെത്രാപ്പോലീത്ത കുറ്റപ്പെടുത്തി. എന്നാല്‍ ചടങ്ങ് ഉദ്ഘാടനം ചെയ്ത ദേവസ്വം മന്ത്രി മെത്രാപ്പോലീത്തയുടെ വിമർശനങ്ങൾക്ക് മറുപടി നല്‍കിയില്ല.

വിശ്വാസ സമൂഹത്തെ കൂടെ നിര്‍ത്തുന്നതില്‍ സര്‍ക്കാരിന് വീഴ്ച്ച പറ്റിയെന്ന് തിരഞ്ഞെടുപ്പ് തോൽവിക്ക് ശേഷമുള്ള അവലോകനത്തിൽ സിപിഎം വിലയിരുത്തിയിരുന്നു. ഇതിന് പിന്നാലെയാണ് മാര്‍ത്തോമ സുറിയാനി സഭയുടെ പരമോദ്ധ്യക്ഷന്‍ ഡോ ജോസഫ് മാര്‍ത്തോമ്മാ മെത്രാപ്പോലീത്താ ശബരിമല വിഷയത്തിലെ സര്‍ക്കാര്‍ നിലപാടിനെ വിമർശിച്ച് രംഗത്തുവന്നത്.