മാധ്യമപ്രവർത്തകയെ അശ്ലീല ദൃശ്യം കാണിച്ച സംഭവം: നഗ്നനായി ഓടി രക്ഷപ്പെട്ട 21കാരനെ പോലീസ് പിടികൂടി

തിരുവനന്തപുരം: ആറ്റിങ്ങലിൽ മാധ്യമ പ്രവർത്തകയെ നേരെ അതിക്രമം (Attack Against Journalist) നടത്തിയ പ്രതിയെ പോലീസ് പിടികൂടി. ബാലരാമപുരം നെല്ലിവിള പുതുവൽ പുത്തൻ വീട്ടിൽ അച്ചു കൃഷ്ണയാണ് പിടിയിലായത്. ഇക്കഴിഞ്ഞ ബുധനാഴ്ച്ച രാത്രി 8: 30 ഒടെ ആറ്റിങ്ങൽ പ്രൈവറ്റ് ബസ് സ്റ്റാൻഡിന് സമീപമായിരുന്നു സംഭവം.

ബസ് കാത്ത് നിൽക്കുകയായിരുന്ന മാധ്യമ പ്രവർത്തകയുടെ അടുത്തെത്തി 21 കാരൻ മൊബൈൽ ഫോണിൽ അശ്ലീല ദൃശ്യങ്ങൾ കാണിക്കുകയായിരുന്നു. തുടർന്ന് ആക്രമിക്കാൻ ശ്രമിക്കുന്നതിനിടെ മാധ്യമപ്രവർത്തക ബഹളം വെക്കുകയും യുവാവിനെ പിടികൂടാൻ പിന്നാലെ ഓടുകയും ചെയ്തു. പിന്നാലെ നാട്ടുകാര്‍ ഓടിക്കൂടിയപ്പോള്‍ യുവാവ് നഗ്നനായി ഓടി രക്ഷപ്പെട്ടു.

സംഭവത്തിൻ്റെ ദൃശ്യങ്ങൾ സമീപ പ്രദേശത്തു നിന്നുള്ള സിസിടിവിയിൽ പതിഞ്ഞിട്ടുണ്ട്. നാട്ടുകാരും പോലീസും ഇയാളെ തിരഞ്ഞെങ്കിലും പിടികൂടാനായില്ല. ഇതോടെ സിസിടിവി ദൃശ്യങ്ങൾ പരിശോധിച്ച് നടത്തിയ അന്വേഷണത്തിലാണ് ആറ്റിങ്ങൽ മാമം ഭാഗത്തു നിന്നും പ്രതിയെ ആറ്റിങ്ങൽ പൊലീസ് പിടികൂടുകയത്.

ആറ്റിങ്ങൽ ഡിവൈഎസ്പി സുനീഷ് ബാബുവിന്റെ നിർദേശപ്രകാരം ആറ്റിങ്ങൽ എസ് എച്ച് ഒ മിഥുൻ ഡി, എസ് ഐമാരായ രാഹുൽ പി ആർ, ബിനിമോൾ. ബി, എസ് സി പി ഒമാരായ ശരത്, അജിത്, സി പി ഒമാരായ രജിത്, ആൽബിൻ എന്നിവർ അടങ്ങിയ സംഘമാണ് പ്രതിയെ പിടികൂടിയത്.