കാഫിർ സ്‌ക്രീൻ ഷോട്ട് വിവാദം : പിന്നിൽ സിപിഎമ്മുകാർ ! വർഗീയത ഉപയോഗിച്ച് ജയിക്കുന്നതിലും നല്ലത് തോൽക്കുന്നതാണെന്ന് ഷാഫി പറമ്പിൽ എം പി

പാലക്കാട് : വടകരയിലെ കാഫിർ സ്‌ക്രീൻ ഷോട്ട് വിവാദത്തിന് പിന്നിൽ അടിമുടി സിപിഎമ്മുകാരാണെന്ന് ഷാഫി പറമ്പിൽ എം പി. എന്തുകൊണ്ടാണ് അവരെ പ്രതികളാക്കുന്നില്ല ? കോടതി ചെവിക്കു പിടിച്ചതു കൊണ്ടാണ് ഇത്രയെങ്കിലും പുറത്ത് വന്നത് എന്നും ഷാഫി പറമ്പിൽ പറഞ്ഞു. കാഫിർ സ്‌ക്രീൻ ഷോട്ട് ആദ്യം പ്രചരിപ്പിച്ചത് ഇടത് സൈബർ വാട്‌സ്ആപ്പ് ഗ്രൂപ്പുകളിലെന്ന പോലീസ് കണ്ടെത്തലിലാണ് ഷാഫിയുടെ പ്രതികരണം.

വർഗീയത ഉപയോഗിച്ച് ജയിക്കുന്നതിലും നല്ലത് തോൽക്കുന്നതാണ്. ഇന്നലെയും ഇന്നും നാളെയും ഇത്തരം കാര്യങ്ങൾ കോൺഗ്രസ് ചെയ്യില്ല. ഇങ്ങനെയുള്ള കാര്യങ്ങൾ ചെയ്ത് കോൺഗ്രസിന് ജയിക്കേണ്ടതില്ലെന്നും ഇതിനും നല്ലത് തോൽക്കുന്നതാണെന്നും ഷാഫി പറമ്പിൽ പറയുന്നു. അതേസമയം, സിപിഎം പ്രവർത്തകർ തന്നെ ഇതിനെ എതിർക്കണം. പോരാളിമാരുടെ മുഖം തെളിഞ്ഞു വരുന്നത് നല്ലതാണ്. ആരുടേയും ഒറ്റ ബുദ്ധിയിൽ തോന്നിയതായി തോന്നുന്നില്ലെന്നും പാർട്ടിക്ക് പങ്കുള്ളതിനാൽ അന്വേഷണം വൈകുന്നുവെന്നും ഷാഫി പറമ്പിൽ ആരോപിച്ചു.

കൂടാതെ വടകരയിലെ ജനങ്ങളെ ഭിന്നിപ്പിക്കുക എന്ന ഒറ്റ ലക്ഷ്യത്തോടെയാണ് ഈ സ്‌ക്രീൻ ഷോട്ട് പുറത്തിറക്കിയത്. വ്യാജമാണെന്ന് ഞങ്ങൾ അന്നേ പറഞ്ഞതാണ്. ഒരോ ദിവസം കഴിയുന്തോറും ഇതിന് പിന്നിലുണ്ടായവരെ വ്യക്തമായികൊണ്ടിരിക്കുകയാണ്. സ്‌ക്രീൻഷോട്ടിൽ യുഡിഎഫിന് പങ്കില്ലെന്ന് നേരത്തെ ഉറപ്പായിരുന്നുവെന്നും സത്യം തെളിയുന്നതിൽ സന്തോഷമുണ്ടെന്നും ഷാഫി പറമ്പിൽ പറഞ്ഞു.