കളമശ്ശേരി സ്‌ഫോടനം; മുഖ്യമന്ത്രി വിളിച്ച സര്‍വ്വ കക്ഷിയോഗം ഇന്ന് രാവിലെ 10 മണിക്ക് ; ശേഷം മുഖ്യമന്ത്രി കളമശേരിയിലേക്ക് തിരിക്കും

തിരുവനന്തപുരം: കളമശ്ശേരി സ്‌ഫോടനത്തിന്റെ പശ്ചാത്തലത്തിൽ മുഖ്യമന്ത്രി വിളിച്ച സർവ്വ കക്ഷിയോ​ഗം ഇന്ന് ചേരും. രാവിലെ 10 മണിക്കാണ് മുഖ്യമന്ത്രിയുടെ നേതൃത്വത്തിൽ യോ​ഗം ചേരുന്നത്. എല്ലാ പാർട്ടി പ്രതിനിധികളേയും മുഖ്യമന്ത്രി സർവ്വകക്ഷിയോ​ഗത്തിലേക്ക് ക്ഷണിച്ചിട്ടുണ്ട്.

വിദ്വേഷം ഉളവാക്കുന്ന പ്രചാരണങ്ങൾ ഒഴിവാക്കേണ്ടതിന്‍റെ ആവശ്യകതയെ കുറിച്ച് യോഗത്തിൽ ചർച്ച ചെയ്യും. സമൂഹമാദ്ധ്യമ ഇടപെടലുകളിൽ പുലര്‍ത്തേണ്ട ജാഗ്രതയും യോ​ഗം ചർച്ച ചെയ്യും. പിന്നാലെ സര്‍വ്വ കക്ഷി വാര്‍ത്താ സമ്മേളനവും നടക്കുമെന്നാണ് പുറത്തുവരുന്ന വിവരം. അതേസമയം, സർവകക്ഷി യോഗത്തിന് ശേഷം മുഖ്യമന്ത്രി കളമശ്ശേരിയിലേക്ക് തിരിക്കും. കളമശ്ശേരിയിൽ ചികിത്സയിൽ കഴിയുന്നവരെയടക്കം മുഖ്യമന്ത്രി സന്ദർശിക്കുമെന്നാണ് സൂചന.

അതേസമയം, കളമശ്ശേരി സ്ഫോടന കേസിൽ പിടികൂടിയ ഡൊമിനിക് മാർട്ടിനെ പോലീസ് ചോദ്യം ചെയ്യുന്നത് തുടരുകയാണ്. മാർട്ടിന് മറ്റാരുടേയെങ്കിലും സഹായം ലഭിച്ചിട്ടുണ്ടോ എന്നാണ് പോലീസ് അന്വേഷിക്കുന്നത്. കൂടുതൽ പരിശോധനകൾക്ക് ശേഷമാകും മാർട്ടിന്റെ അറസ്റ്റ് എന്നാണ് പോലീസ് വ്യക്തമാക്കുന്നത്. കളമശ്ശേരി എ.ആർ. ക്യാംപിൽ വെച്ചാണ് ഡൊമിനിക് മാർട്ടിന്‍റെ ചോദ്യം ചെയ്യൽ നടക്കുന്നത്. നിലവിലെ സാഹചര്യത്തിൽ സംസ്ഥാന പോലീസ്, എൻഐഎ, എഎസ്ജി തുടങ്ങിയ ഏജൻസികളിലെ ഉന്നത ഉദ്യോ​ഗസ്ഥർ കൊച്ചിയിൽ ക്യാംപ് ചെയ്യുന്നുണ്ട്.