‘കള്ളക്കുറിച്ചി കൽവരയൻ കുന്നിന് ചുറ്റുമുള്ള കുഗ്രാമങ്ങൾ ഉടൻ സന്ദർശിക്കണം; പരാതികൾ പരിശോധിക്കണം’; സ്റ്റാലിനോടും ഉദയനിധിയോടും ആവശ്യപ്പെട്ട് മദ്രാസ് ഹൈക്കോടതി

ചെന്നൈ: സേലം, കള്ളക്കുറിച്ചി ജില്ലകളിലെ കൽവരയൻ കുന്നുകൾക്ക് ചുറ്റുമുള്ള കുഗ്രാമങ്ങൾ മുഖ്യമന്ത്രി എം കെ സ്റ്റാലിനോ കായിക വികസന യുവജനക്ഷേമ മന്ത്രി ഉദയനിധി സ്റ്റാലിനോ സന്ദർശിക്കുകയും ദാരിദ്ര്യം കാരണം വ്യാജമദ്യം വിൽപ്പന നടത്തുന്നവരുടെ പരാതികൾ പരിശോധിക്കണമെന്നും ആവശ്യപ്പെട്ട്
മദ്രാസ് ഹൈക്കോടതി. കൽവരയൻ മലനിരകളിലെ സ്ഥിതിഗതികൾ മുഖ്യമന്ത്രി, കായിക മന്ത്രി, ആദി ദ്രാവിഡർ ക്ഷേമ മന്ത്രി എൻ. കായൽവിഴി സെൽവരാജ് എന്നിവരെ ധരിപ്പിക്കാൻ അഡ്വക്കേറ്റ് ജനറൽ പി.എസ്.രാമനോട് ആവശ്യപ്പെട്ട് ജസ്റ്റിസുമാരായ എസ്.എം.സുബ്രഹ്മണ്യം, സി.കുമാരപ്പൻ എന്നിവരടങ്ങിയ ഡിവിഷൻ ബെഞ്ച് ഇടക്കാല ഉത്തരവ് പുറപ്പെടുവിച്ചു.

ആദിവാസി കുഗ്രാമങ്ങളിലെ കുട്ടികൾക്ക് വൈദ്യുതി, കുടിവെള്ളം, വിദ്യാഭ്യാസം തുടങ്ങിയ അടിയന്തര സഹായം ഉറപ്പാക്കാൻ മുഖ്യമന്ത്രിയുടെയോ മന്ത്രിമാരുടെയോ സന്ദർശനത്തിന് മാത്രമേ കഴിയൂവെന്ന് ജഡ്ജിമാർ പറഞ്ഞു. കൂടാതെ വിനോദസഞ്ചാരം പ്രോത്സാഹിപ്പിക്കുന്നതിലൂടെയോ മറ്റ് വഴികളിലൂടെയോ തൊഴിലവസരങ്ങൾ ലഭ്യമാക്കുന്നത് പോലുള്ള ദീർഘകാല പരിഹാരങ്ങളും കണ്ടെത്തണം. 66 പേരുടെ മരണത്തിനിടയാക്കിയ കള്ളക്കുറിച്ചി വിഷമദ്യ ദുരന്തത്തിന് ശേഷം ഡിവിഷൻ ബെഞ്ച് സ്വമേധയാ ഫയൽ ചെയ്ത് പൊതുതാൽപ്പര്യ ഹർജിയിൽ വാദം കേൾക്കുന്നതിനിടെയാണ് ജീവിതത്തിന്റെ രണ്ടറ്റവും കൂട്ടിമുട്ടിക്കാൻ മറ്റ് മാർഗങ്ങളില്ലാത്തതിനാൽ വ്യാജമദ്യം വിൽക്കുന്ന ഗോത്രവർഗക്കാരുടെ ഉപജീവനമാർഗം മെച്ചപ്പെടുത്തുന്നതിനുള്ള നിരീക്ഷണങ്ങൾ കോടതി നടത്തിയത്.

“1996ൽ മാത്രമാണ് ഈ കുഗ്രാമങ്ങളിൽ ആദ്യമായി തിരഞ്ഞെടുപ്പ് നടന്നതെന്ന് മുഖ്യമന്ത്രിയെ അറിയിക്കണം. അതുവരെ സംസ്ഥാനത്തെ രാഷ്‌ട്രീയ പാർട്ടികൾ എന്താണ് ചെയ്തിരുന്നതെന്ന് ഞങ്ങൾക്ക് അറിയില്ല. ഇപ്പോൾ പോലും അമിക്കസ് ക്യൂറി കെആർ തമിഴ്മണി പറയുന്നത്, കുഗ്രാമങ്ങളിലെ ഗർഭിണികളെ പ്രധാന റോഡിലെത്താൻ ഏകദേശം 30 മുതൽ 40 കിലോമീറ്റർ വരെ തോളിൽ ചുമക്കേണ്ടിവരുമെന്ന്,” ജഡ്ജി എജിയോട് പറഞ്ഞു.

ജഡ്ജിമാർ കുഗ്രാമങ്ങൾ സന്ദർശിക്കുന്നത് വലിയ മാറ്റമുണ്ടാക്കില്ല, മറിച്ച്, മുഖ്യമന്ത്രിയോ മന്ത്രിമാരുടെയോ സന്ദർശനത്തിന് വലിയ മാറ്റമുണ്ടാക്കാനും ജീവിതസാഹചര്യങ്ങളിൽ അഭികാമ്യമായ മാറ്റം കൊണ്ടുവരാനും കഴിയുമെന്നും അദ്ദേഹം പറഞ്ഞു. കുഗ്രാമങ്ങളിലെ നിലവിലെ അവസ്ഥയെക്കുറിച്ച് അമിക്കസ് ക്യൂറി സമർപ്പിച്ച റിപ്പോർട്ടും ജഡ്ജിമാർ രേഖപ്പെടുത്തി . എ ജിക്ക് ഔദ്യോഗിക റിപ്പോർട്ട് സമർപ്പിക്കാൻ ബെഞ്ച് വെള്ളിയാഴ്ച വരെ സമയം അനുവദിച്ചു. ഇതിനിടെ കോടതിയുടെ ആവശ്യം മുഖ്യമന്ത്രിയെയും മറ്റ് രണ്ട് മന്ത്രിമാരെയും അറിയിക്കാൻ എജിയോട് ബെഞ്ച് ആവശ്യപ്പെട്ടു.