ഭരണം നഷ്ടമായെങ്കിലും മദ്ധ്യപ്രദേശിൽ ഫ്ലക്സ് ബോർഡിൽ കമൽനാഥ് തന്നെ മുഖ്യമന്ത്രി, തെരഞ്ഞെടുപ്പ് ഫലം തിരിച്ചടിയായതോടെ കോൺഗ്രസ് ഓഫീസുകൾ ശൂന്യം

ദില്ലി: നിയമസഭ തെരഞ്ഞെടുപ്പിൽ വോട്ടെണ്ണുന്നതിന് മുമ്പ് തന്നെ മദ്ധ്യപ്രദേശിൽ കോൺഗ്രസ് നേതാവ് കമൽനാഥിന് അഭിവാദ്യമർപ്പിച്ച് ബാനർ. മുഖ്യമന്ത്രി സ്ഥാനത്തെത്തിയ കമൽനാഥിന് അഭിനന്ദനങ്ങൾ അറിയിച്ചായിരുന്നു ബാനർ.​ ഭോപ്പാലിലെ കോൺഗ്രസ് ഓഫീസിന് പുറത്താണ് ബാനർ പ്രത്യക്ഷപ്പെട്ടത്.

  സമൂഹ മാദ്ധ്യമമായ എക്സിലും കമൽനാഥിനെ അഭിനന്ദിച്ച് പോസ്റ്റുകൾ വന്നിരുന്നു. എല്ലാ കോൺഗ്രസ് സ്ഥാനാർത്ഥികൾക്കും അഭിനന്ദനങ്ങൾ, സുതാര്യമായ വോട്ടെണ്ണൽ ഉറപ്പാക്കാൻ എല്ലാവരും പരിശ്രമിക്കണമെന്നുമായിരുന്നു കോൺഗ്രസ് നേതാവ് ദ്വിഗ്‍വിജയ് സിങ്ങിൻ്റെ ട്വീറ്റ്.

   അതേസമയം, ബാനറിനെ കുറിച്ചുള്ള ചോദ്യത്തിന് ദ്വിഗ്‍വിജയ് സിങ് മറുപടി പറയാൻ തയാറായില്ല. അത് വെച്ചവരോട് ചോദിക്കണമെന്നായിരുന്നു അദ്ദേഹത്തിൻ്റെ പ്രതികരണം. ബി.ജെ.പി മദ്ധ്യപ്രദേശിൽ വ്യക്തമായ മുന്നേറ്റമാണ് നടത്തുന്നത്. 163 ലേറെ സീറ്റുകളിലാണ് മദ്ധ്യപ്രദേശിൽ ബി.ജെ.പി ലീഡ് ചെയ്യുന്നത്. കോൺഗ്രസിൻ്റെ മുന്നേറ്റം 65  സീറ്റുകളിലൊതുങ്ങി. 230 സീറ്റുകളിലേക്കാണ് ഇലക്ഷൻ നടക്കുന്നത്. എക്സിറ്റ് പോളുകളിൽ ചിലത് കോൺ​ഗ്രസ് മുന്നേറ്റം പ്രവചിച്ചിരുന്നു.