മഹർഷി ചരക് ശപഥിനെതിരെ വാദിക്കുന്നവർക്ക് അറിയാമോ, യഥാർത്ഥത്തിൽ ചരക മഹർഷി ആരാണെന്ന്? വിവാദങ്ങൾ ഉണ്ടാക്കുന്നവർക്ക് ചുട്ട മറുപടിയുമായി അഭിഭാഷകന്റെ ഫേസ്ബുക്ക് പോസ്റ്റ്

ദില്ലി: ‘ഹിപ്പോക്രാറ്റിക് പ്രതിജ്ഞ’ മാറ്റി പകരം ചരക മഹർഷിയുടെ പേരിലുള്ള പ്രതിജ്ഞ (മഹർഷി ചരക് ശപഥ്) (Charak Shapath) ഉൾപ്പെടുത്താൻ ദേശീയ മെഡിക്കൽ കമ്മിഷൻ ഈയിടയ്ക്കാണ് തീരുമാനിച്ചത്. ഒന്നാം വർഷ എംബിബിഎസ് വിദ്യാർത്ഥികൾ പഠനത്തിന്റെ ആദ്യ ദിവസം ചൊല്ലുന്നതാണ് ഈ പ്രതിജ്ഞ. എന്നാൽ ഇതാ മറ്റെല്ലാ വിഷയങ്ങളെപ്പോലെയും ഇതിനെതിരെയും ചിലർ പ്രതിഷേധവുമായി എത്തിയിട്ടുണ്ട്.

അതിനാൽ തന്നെ ആയുർവേദ ആചാര്യനായ ചരകനെ കുറിച്ച് നാം പൂർണ്ണമായി അറിയേണ്ടതുണ്ട്. ഈ വിഷയവുമായി ബന്ധപ്പെട്ട് കമൽജിത്ത് കമലാസനൻ എന്ന ഒരു അഭിഭാഷകൻ പങ്കുവച്ച ഒരു കുറിപ്പ് സമൂഹ മാധ്യമങ്ങളിൽ ശ്രദ്ധേയമായിരിക്കുകയാണ്.

അഭിഭാഷകന്റെ കുറിപ്പിന്റെ പൂർണ്ണരൂപം:

മെഡിക്കൽ വിദ്യാർത്ഥികൾക്ക് ഹിപ്പോക്രാറ്റിക് ഓത്തിനു പകരം ചരക ശപഥ്‌ കൊണ്ടുവരാൻ കേന്ദ്രം നീക്കം നടത്തുകയാണല്ലോ . എന്നത്തേയും പോലെ ചില കോണുകളിൽ നിന്നും വിവാദങ്ങളും കുത്തിത്തിരുപ്പുകളും ഉയർന്നിട്ടുണ്ട് . അതിനാൽ തന്നെ ആയുർവേദ ആചാര്യനായ ചരകനെ കുറിച്ച് നാം അറിയേണ്ടത് .

ചരകൻ:

ഏറ്റവും പഴക്കമേറിയതു എന്നു വിശ്വസിക്കപ്പെടുന്ന ആയുർവേദ ഗ്രന്ഥമായ ചരക സംഹിതയുടെ രചയിതാവായ ഇദ്ദേഹത്തിന്റെ ജീവിത കാലത്തെ കുറിച്ച് കൃത്യമായ വിവരങ്ങൾ ലഭ്യമല്ല . യജുർവേദത്തിൽ പരാമർശിക്കപ്പെടുന്നതിനാൽ വേദ കാലത്തോ അതിനു മുൻപോ ആകും ചരകന്റെ ജീവിതകാലം .

ചരകനാൽ പരിഷ്കരിക്കപ്പെട്ട അഗ്നിവേശ സംഹിതയാണ് ചരക സംഹിത ആയി മാറിയത് എന്നു വാദങ്ങൾ ഉണ്ട് . പിൽക്കാലത്തു ദൃഢബലൻ ആണ് ചരക സംഹിതയ്ക്കു ഇന്നത്തെ പൂർണ്ണ രൂപം നൽകിയത് .

ഭൂമിയിൽ അവതാരമെടുത്ത അനന്ത ഭഗവാൻ ആണ് ചരകൻ എന്നും വിശ്വസിക്കുന്നുണ്ട് .ബൗദ്ധ സ്വാധീനം തരിമ്പും ചരകത്തിൽ ഇല്ലാത്തതിനാൽ ബുദ്ധന്റെ കാലത്തിനു മുൻപായിരുന്നു ചരകന്റെ ജീവിതകാലം എന്നത് ഉറപ്പാണ് .

ചരക സംഹിത :

കായ ചികിത്സയ്ക്കാണ് ചരകത്തിൽ പ്രാധാന്യം നൽകിയിട്ടുള്ളത് . പ്രപഞ്ചവും മനുഷ്യനും പോലെ ആഹാരപദാർത്ഥങ്ങളും ഔഷധങ്ങളും പഞ്ചഭൂത നിർമ്മിതം ആണെന്നാണ് ചരകൻ അഭിപ്രായപ്പെട്ടിട്ടുള്ളത് . പൈതഗോറിയൻ സിദ്ധാന്തത്തെ പിൻതുടർന്നു ചതുർഭൂത നിർമ്മിതം ആണ് മനുഷ്യ ശരീരം എന്നാണ് ഹിപ്പോക്രേറ്റസ് പറഞ്ഞിട്ടുള്ളത് ( ആകാശം ഇല്ല ).

എട്ട് സ്ഥാനങ്ങളും , നൂറ്റി ഇരുപത് അദ്ധ്യായങ്ങളും ഉള്ള ചരക സംഹിതയിൽ രസായന ചികിത്സയിൽ തുടങ്ങി മൃഗങ്ങൾക്കു ഉള്ള ചികിത്സ വരെ വിശദമായി പ്രതിപാദിച്ചിട്ടുണ്ട് .

രോഗങ്ങളെ അകറ്റി നിർത്തുവാൻ , ആഹാരം എപ്രകാരം ആയിരിക്കണം എന്നു ചരകൻ സംഹിതയിൽ കൃത്യമായി വിവരിക്കുമ്പോൾ , ” let food be thy medicine , and let thy medicine be food .” എന്നു തന്നെയാണ് നൂറ്റാണ്ടുകൾക്ക് ശേഷം ഹിപ്പോക്രേറ്റസ് പറഞ്ഞത് .

എല്ലാ രോഗങ്ങൾക്കും പ്രകൃതിദത്ത കാരണങ്ങൾ ഉണ്ടെന്നു പറഞ്ഞ ഹിപ്പോക്രേറ്റസ് , അന്ധവിശ്വാസങ്ങളുടെ കണ്ണിലൂടെ രോഗങ്ങളെ കണ്ടിരുന്ന ഗ്രീക്കുകാരെ അതിൽ നിന്നും മോചിപ്പിക്കാൻ ജീവിതം ഉഴിഞ്ഞു വെച്ചപ്പോൾ , പ്രബുദ്ധരായിരുന്ന അന്നത്തെ ഇന്ത്യൻ ജനതയ്ക്കു കുറച്ചു കൂടി മെച്ചപ്പെട്ട ചികിത്സ രീതികൾ പറഞ്ഞു കൊടുക്കുക എന്നതിൽ ഉപരി ബോധവൽക്കരണ ക്‌ളാസ്സുകൾ നടത്തേണ്ട ആവശ്യം ചരകന് ഇല്ലായിരുന്നു .

പ്രാചീന അറേബ്യായിലും , റോമാ സാമ്രാജ്യത്തിലും ഒക്കെ പ്രചരിച്ചിരുന്ന ചരകന്റെ ചികിത്സാ രീതികളെ കുറിച്ച് ഇന്നും പാശ്ചാത്യ രാജ്യങ്ങളിൽ ഗഹനമായ പഠനങ്ങളും ഗവേഷണങ്ങളും നടക്കുന്നുണ്ട് . പക്ഷെ അഷ്ടാംഗഹൃദയ രചനയ്ക്ക് ആധാരമായ ചരക സംഹിതയും , ചരകനും എന്നൊക്കെ കേൾക്കുമ്പോൾ ഇന്ത്യൻ ലിബറലുകൾക്ക് പുച്ഛമാണ് .

അല്ലെങ്കിൽ തന്നെ വീട്ടിൽ വജ്രം വെച്ചിട്ട് , അപ്പുറത്തവന്റെ കയ്യിലെ ചില്ലു കഷണം കണ്ടു കണ്ണ് തള്ളാൻ തക്ക രീതിയിൽ മസ്തിഷ്ക പ്രക്ഷാളനം ചെയ്യപ്പെട്ട വിഡ്ഢികളുടെ നാടാണല്ലോ ആധുനിക ഭാരതം .

ഹിപ്പോക്രേറ്റിക് ഓത്ത് ഗ്രീക്കുകാർ എടുക്കട്ടെ .. ഭാരതീയർ ചകര ശപഥും .????????