കഞ്ചിക്കോട് കോച്ച് ഫാക്ടറി പദ്ധതി ഉപേക്ഷിച്ചു ! രാജ്യസഭയിൽ വ്യക്തത വരുത്തി റെയിൽവേ മന്ത്രി ; ഏറ്റെടുത്ത ഭൂമി, റെയിൽവേയുടെ മറ്റ് ആവശ്യങ്ങൾക്കായി ഉപയോഗിക്കും

ദില്ലി : പാലക്കാട് കഞ്ചിക്കോട് റെയിൽവേ കോച്ച് ഫാക്ടറി നിലവിൽ റെയിൽവേയുടെ പരിഗണനയിലില്ലെന്ന് കേന്ദ്ര റെയിൽവേ മന്ത്രി അശ്വിനി വൈഷ്‌ണവ് രാജ്യസഭയെ അറിയിച്ചു. ബ്രിട്ടാസ് എം.പി ഉന്നയിച്ച ചോദ്യത്തിന് രേഖാമൂലം മറുപടി നൽകവെയാണ് മന്ത്രി ഈ നിർണ്ണായക വിവരം വ്യക്തമാക്കിയത്. രാജ്യത്ത് നിലവിലുള്ള ഉൽപ്പാദന യൂണിറ്റുകളും ഇതുവരെ പ്രഖ്യാപിച്ചിട്ടുള്ള പദ്ധതികളും ഭാവി ആവശ്യങ്ങൾക്ക് പൂർണ്ണമായും പര്യാപ്തമാണെന്നാണ് റെയിൽവേയുടെ നിലപാടെന്ന് മന്ത്രി വിശദീകരിച്ചു.

കോച്ച് ഫാക്ടറിക്കായി കഞ്ചിക്കോട്ട് ഏറ്റെടുത്ത 228 ഏക്കർ ഭൂമി റെയിൽവേയുടെ മറ്റ് ഭാവി വികസന ആവശ്യങ്ങൾക്കായി ഉപയോഗിക്കുമെന്ന് കേന്ദ്ര സർക്കാർ വ്യക്തമാക്കി. ഇതോടൊപ്പം, സിൽവർ ലൈൻ പദ്ധതിയുമായും ഇ. ശ്രീധരൻ മുന്നോട്ടുവെച്ച ഹൈസ്പീഡ് റെയിൽ പദ്ധതിയുമായും മുന്നോട്ട് പോകില്ലെന്ന് കേരള സർക്കാർ ഔദ്യോഗികമായി നിലപാടെടുത്തതായും ജോൺ ബ്രിട്ടാസിന്റെ ചോദ്യത്തിന് മറുപടിയായി മന്ത്രി സഭയെ അറിയിച്ചു. പ്രതിപക്ഷ എം.പിമാരുടെ ശക്തമായ ബഹളത്തിനിടയിലും രാജ്യസഭ എം.എസ്.എം.ഇ ബിൽ പാസാക്കിയ ശേഷം സഭാ നടപടികൾ അടുത്ത ദിവസത്തേക്ക് പിരിഞ്ഞു.