അഞ്ച് ജില്ലകള്‍ നാളെ ബൂത്തിലേക്ക്; കണ്ണൂരിൽ പ്രശ്ന സാധ്യത,? സുരക്ഷ ശക്തമാക്കി

കണ്ണൂർ: തദ്ദേശ തിരഞ്ഞെടുപ്പിലെ അവസാനഘട്ട വോട്ടെടുപ്പ് നാളെ നടക്കാനിരിക്കെ കണ്ണൂർ ജില്ലയിൽ സുരക്ഷ കർശനമാക്കി പൊലീസ്. പോളിങ് സാമഗ്രികളുടെ വിതരണം ആരംഭിച്ചു. മലയോര മേഖലകളിൽ 64 ബൂത്തുകളിൽ മാവോയിസ്റ്റ് ഭീഷണിയുണ്ടെന്നും, ഇവിടങ്ങളിൽ തണ്ടർ ബോൾട്ട് ഉൾപ്പടെയുള്ള ട്രിപ്പിൾ ലോക്ക് സംരക്ഷണം ഒരുക്കുമെന്നും കണ്ണൂർ എസ്പി യതീഷ് ചന്ദ്ര അറിയിച്ചു.ജില്ലയിൽ 1671 പ്രശ്‌ന ബാധിത ബൂത്തുകളാണ് ഉള്ളത്. സമാധാനപരമായ പോളിംഗ് തടസപ്പെടുത്തുന്നവരെ കരുതൽ തടങ്കലിലാക്കുമെന്നും, എട്ടായിരത്തോളം പൊലീസുകാരെ വിന്യസിച്ചിട്ടുണ്ടെന്നും യതീഷ് ചന്ദ്ര പറഞ്ഞു.

കള്ളവോട്ട് തടയാൻ 1500 ബൂത്തുകളിൽ വീഡിയോ ക്യാമറകൾ സജ്ജീകരിച്ചിട്ടുണ്ടെന്നും അദ്ദേഹം കൂട്ടിച്ചേർത്തു. കോവിഡ് രോഗികൾക്കും ക്വാറന്റീനിൽ കഴിയുന്നവർക്കും വൈകുന്നേരം ആറിന് ശേഷം വോട്ടു ചെയ്യാൻ പ്രത്യേക സൗകര്യമൊരുക്കും. മലപ്പുറം, കോഴിക്കോട്, കണ്ണൂർ, കാസർകോട് ജില്ലകളിലെ 354 തദ്ദേശ സ്ഥാപനങ്ങളിലെ 6867 വാർഡുകളിലേക്കാണ് നാളെ തിരഞ്ഞെടുപ്പ് നടക്കുന്നത്. 42,87,597 പുരുഷൻമാരും 46,87,310 സ്ത്രീകളും 86 ട്രാൻസ്‌ജെൻഡേഴ്‌സും അടക്കം 89,74,993 പേരാണ് സമ്മതിദാനം നി‌ർ‌വഹിക്കുന്നത്. 71,906 പുതിയ വോട്ടർമാരും 1,747 പ്രവാസി വോട്ടർമാരും ഉൾപ്പെടുന്നു. പോളിംഗ് ബൂത്തുകൾ- 10,842.