രാജ്യത്ത് ഏറ്റവും കൂടുതൽ പേർ ഐ എസിൽ ചേർന്നത് കണ്ണൂരിൽ നിന്നും: അന്വേഷണ ഏജന്‍സികളുടെ റിപ്പോർട്ട് പുറത്ത്

തിരുവനന്തപുരം: സിപിഎം ശക്തികേന്ദ്രമായ കണ്ണൂർ രാജ്യത്തെ ഭീകരവാദ തലസ്ഥാനമായി മാറുന്നതായി റിപ്പോർട്ട്. ഇതു വരെ ഇസ്ലാമിക് സ്റ്റേറ്റിൽ ചേർന്ന് ഭീകരവാദ പ്രവർത്തനം നടത്തിയ 38 മലയാളികളാണ് കൊല്ലപ്പെട്ടിരിക്കുന്നത്.കഴിഞ്ഞ കുറച്ച് വർഷങ്ങൾക്കിടെ കേരളത്തിൽ നിന്നും നിരവധി യുവാക്കളും യുവതികളുമാണ് ഭീകര സംഘടനയായ ഇസ്ലാമിക് സ്റ്റേറ്റിൽ ചേർന്നത്. ഇതിൽ ഭൂരിപക്ഷം പേരും കേരളത്തിലെ കണ്ണൂർ ജില്ലയിൽ നിന്നുള്ളവരാണെന്ന് ദേശീയ- അന്തർദ്ദേശീയ അന്വേഷണ ഏജൻസികൾ സ്ഥിരീകരിക്കുന്നു.

ജൂൺ പതിനഞ്ച് വരെയുള്ള കണക്കനുസരിച്ച് കണ്ണൂരിൽ നിന്നും ഐ എസിൽ ചേർന്നിരിക്കുന്നവരുടെ എണ്ണം നാൽപ്പതാണ്. ഇതിൽ എട്ട് പേർ സ്ത്രീകളാണ്.

കഴിഞ്ഞ കുറച്ച് വർഷങ്ങൾക്കിടെ കേരളത്തിൽ നിന്ന് ഐ എസിൽ ചേർന്നവരുടെ എണ്ണം 98 ആണ്. ഇതിൽ 38 പേർ കൊല്ലപ്പെട്ടു. ബാക്കി അറുപതോളം പേർ ലോകത്തിന്‍റെ വിവിധ ഭാഗങ്ങളിലായി ഭീകരവാദ പ്രവർത്തനങ്ങളിൽ ഏർപ്പെട്ടു കൊണ്ടിരിക്കുകയാണ്.

കണ്ണൂരിന് പുറമെ കാസർകോഡ്, മലപ്പുറം, കോഴിക്കോട്, പാലക്കാട്, എറണാകുളം, തൃശൂർ തുടങ്ങിയ ജില്ലകളിൽ നിന്നും നിരവധി പേർ ഐ എസിൽ ചേർന്നിട്ടുണ്ട്.

മലയാളികളെ ഇസ്ലാമിക് സ്റ്റേറ്റിൽ ചേരാൻ പ്രേരിപ്പിക്കുന്ന പല സാമൂഹ്യമാദ്ധ്യമ സന്ദേശങ്ങളുടെയും ഉറവിടം ഗൾഫ് രാജ്യങ്ങളാണെന്ന് അന്വേഷണത്തിൽ ബോദ്ധ്യപ്പെട്ടിരുന്നു.ഈ കൂട്ടായ്മകൾ പ്രധാനമായും ലക്ഷ്യം വെക്കുന്നത് കണ്ണൂരിലെ തീവ്ര ചിന്താഗതിക്കാരായ മുസ്ലീം ചെറുപ്പക്കാരെയാണ്.

ശ്രീലങ്കയിലെ ക്രൈസ്തവ ദേവാലയങ്ങളിൽ അടക്കമുണ്ടായ സ്ഫോടനങ്ങളിൽ മലയാളികൾ ബന്ധപ്പെട്ടിരുന്നതായി വിവരങ്ങൾ പുറത്ത് വന്നിരുന്നു. കേരളത്തിൽ നിന്ന് ഐ.എസിൽ ചേർന്നവരിൽ നിരവധി പേർ പോപ്പുലർ ഫ്രണ്ടിൽ നിന്നാണെന്നും വ്യക്തമായിരുന്നു. ഈ സാഹചര്യത്തിൽ ഇത്തരം വിവരങ്ങളെ ഭയപ്പാടോടെയാണ് മലയാളി സമൂഹം നോക്കിക്കാണുന്നത്.