കേരളത്തിന്റെ വിധിയെഴുത്ത് റെക്കോർഡ് പോളിംഗിലേക്ക് ;അവസാന റിപ്പോർട്ടുകൾ പ്രകാരം വോട്ട് രേഖപ്പെടുത്തിയത് 67.10 ശതമാനം പേർ ; ശതമാനം 90 കടന്നേക്കുമെന്ന് രത്തൻ ഖേൽക്കര്‍

തിരുവനന്തപുരം : കേരളത്തിന്റെ രാഷ്ട്രീയ ഭാവി നിർണ്ണയിക്കുന്ന നിയമസഭാ തെരഞ്ഞെടുപ്പിൽ ജനങ്ങളുടെ ആവേശകരമായ പങ്കാളിത്തം. വോട്ടെടുപ്പ് അവസാന മണിക്കൂറുകളിലേക്ക് കടക്കുമ്പോൾ സംസ്ഥാനത്തിന്റെ വിവിധ ഭാഗങ്ങളിൽ മികച്ച പോളിംഗാണ് രേഖപ്പെടുത്തുന്നത്. ഏറ്റവും പുതിയ കണക്കുകൾ പ്രകാരം ഉച്ച കഴിഞ്ഞ് മൂന്ന് മണി പിന്നിടുമ്പോൾ പോളിംഗ് 62.71 ശതമാനത്തിലെത്തി. രാവിലെ മുതൽ തന്നെ പോളിംഗ് ബൂത്തുകൾക്ക് മുന്നിൽ വോട്ടർമാരുടെ നീണ്ട നിര ദൃശ്യമായിരുന്നു. ഉച്ചയോടെ വോട്ടിംഗ് ശതമാനം 40 കടന്നതോടെ സംസ്ഥാനത്ത് ഇത്തവണ വലിയ പോളിംഗ് രേഖപ്പെടുത്തുമെന്ന സൂചനയാണ് ലഭിക്കുന്നത്.

സംസ്ഥാനത്തെ 140 മണ്ഡലങ്ങളിലായി സജ്ജീകരിച്ചിരിക്കുന്ന 30,495 ബൂത്തുകളിലാണ് വോട്ടെടുപ്പ് പുരോഗമിക്കുന്നത്. ആകെ 2.71 കോടി വോട്ടർമാരാണ് ജനപ്രതിനിധികളെ തിരഞ്ഞെടുക്കാൻ ഇത്തവണ ബൂത്തുകളിലെത്തുന്നത്. 883 സ്ഥാനാർത്ഥികളാണ് തിരഞ്ഞെടുപ്പ് ഗോദയിൽ മാറ്റുരയ്ക്കുന്നത്. കഴിഞ്ഞ 23 ദിവസങ്ങളിലായി നടന്ന തീപാറുന്ന പ്രചാരണ പരിപാടികൾക്ക് ശേഷമാണ് കേരളം ഇന്ന് വിധി നിർണ്ണയിക്കുന്നത്. അനിഷ്ട സംഭവങ്ങളില്ലാതെ സമാധാനപരമായാണ് വോട്ടെടുപ്പ് നടക്കുന്നത്.

പ്രമുഖ നേതാക്കളെല്ലാം രാവിലെ തന്നെ അതത് ബൂത്തുകളിലെത്തി വോട്ട് രേഖപ്പെടുത്തി. മുഖ്യമന്ത്രി പിണറായി വിജയൻ, പ്രതിപക്ഷ നേതാവ് വി.ഡി സതീശൻ, കെപിസിസി അധ്യക്ഷൻ സണ്ണി ജോസഫ്, ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ തുടങ്ങിയവർ പുലർച്ചെ തന്നെ വോട്ട് രേഖപ്പെടുത്തി ആത്മവിശ്വാസം പ്രകടിപ്പിച്ചു. സിനിമാ താരം മോഹൻലാൽ ഉൾപ്പെടെയുള്ള പ്രമുഖരും വോട്ടിംഗിൽ പങ്കാളികളായി. വോട്ടെടുപ്പ് അവസാനിക്കാൻ മിനിറ്റുകൾ മാത്രം ബാക്കിനിൽക്കെ ശേഷിക്കുന്ന വോട്ടർമാരും തങ്ങളുടെ അവകാശം വിനിയോഗിക്കാനായി ബൂത്തുകളിലേക്ക് എത്തിക്കൊണ്ടിരിക്കുകയാണ്.