‘കേരളം’ ഇനി ഔദ്യോഗിക പേരാകുമോ?; സംസ്ഥാന പേരുമാറ്റ ബിൽ നാളെ ലോക്സഭയിൽ; പ്രധാനമന്ത്രിക്കും കേന്ദ്ര ആഭ്യന്തരമന്ത്രിക്കും നന്ദി അറിയിച്ച് രാജീവ് ചന്ദ്രശേഖർ

ന്യൂദില്ലി: സംസ്ഥാനത്തിന്റെ ഔദ്യോഗിക പേര് ‘കേരള’ എന്നതിൽ നിന്ന് ‘കേരളം’ എന്നാക്കി മാറ്റുന്നതിനുള്ള ബിൽ നാളെ ലോക്സഭയിൽ അവതരിപ്പിക്കും. കേന്ദ്ര ആഭ്യന്തരമന്ത്രി അമിത് ഷാ ബിൽ സഭയിൽ അവതരിപ്പിക്കുമെന്നാണ് ലോക്സഭയുടെ കാര്യപരിപാടിയിൽ വ്യക്തമാക്കിയിരിക്കുന്നത്.

‘കേരള പേരുമാറ്റ ബിൽ, 2026’ ആണ് നാളെ ലോക്സഭയുടെ പരിഗണനയ്ക്ക് എത്തുന്നത്. ഭരണഘടനയിൽ സംസ്ഥാനത്തിന്റെ പേര് ‘കേരളം’ എന്നാക്കി മാറ്റുന്നതിനൊപ്പം, ഭരണഘടനയുടെ എട്ടാം പട്ടികയിൽ ഉൾപ്പെട്ടിരിക്കുന്ന എല്ലാ ഭാഷകളിലും പേര് ‘കേരളം’ എന്നാക്കി മാറ്റണമെന്ന ആവശ്യവും ബില്ലിലുണ്ട്.

സംസ്ഥാനത്തിന്റെ പേര് മാറ്റണമെന്ന ആവശ്യം കേരള നിയമസഭ നേരത്തെ തന്നെ മുന്നോട്ടുവച്ചിരുന്നു. 2023 ഓഗസ്റ്റിലാണ് ഇതുമായി ബന്ധപ്പെട്ട പ്രമേയം നിയമസഭ പാസാക്കിയത്. മുഖ്യമന്ത്രി പിണറായി വിജയൻ അവതരിപ്പിച്ച പ്രമേയം അന്ന് പ്രതിപക്ഷത്തിന്റെ ഭേദഗതികളില്ലാതെ അംഗീകരിച്ചിരുന്നു.

തുടർന്ന് സംസ്ഥാനത്തിന്റെ ഔദ്യോഗിക പേര് ‘കേരള’യിൽ നിന്ന് ‘കേരളം’ എന്നാക്കാനുള്ള നിർദേശത്തിന് കേന്ദ്രമന്ത്രിസഭ കഴിഞ്ഞ ഫെബ്രുവരിയിൽ അംഗീകാരം നൽകി. ഇതിന് പിന്നാലെയാണ് പേരുമാറ്റത്തിനുള്ള നിയമനടപടികൾ കേന്ദ്രസർക്കാർ മുന്നോട്ടുകൊണ്ടുപോകുന്നത്.

അതേസമയം, ബിൽ ലോക്സഭയിൽ അവതരിപ്പിക്കുന്നതിൽ സന്തോഷം പ്രകടിപ്പിച്ച് സംസ്ഥാനത്തിന്റെ ആവശ്യം പരിഗണിച്ചതിന് പ്രധാനമന്ത്രി നരേന്ദ്ര മോദിക്കും കേന്ദ്ര ആഭ്യന്തരമന്ത്രി അമിത് ഷായ്ക്കും നന്ദി അറിയിച്ചിട്ടുണ്ട് ബിജെപി സംസ്ഥാന അധ്യക്ഷനും എംഎൽഎയുമായ രാജീവ് ചന്ദ്രശേഖർ.

കേരളത്തിന്റെ സംസ്കാരത്തെയും പൈതൃകത്തെയും ഭാഷയെയും ഔദ്യോഗികമായി ആദരിക്കണമെന്ന ദീർഘകാല ആവശ്യമാണ് ഇതിലൂടെ യാഥാർഥ്യമാകുന്നതെന്നും അദ്ദേഹം വ്യക്തമാക്കി. പ്രധാനമന്ത്രിയോട് നേരത്തെ ഉന്നയിച്ച ആവശ്യം ഭരണഘടനാപരമായ യാഥാർഥ്യത്തിലേക്ക് നീങ്ങുകയാണെന്നും അദ്ദേഹം പറഞ്ഞു.