സംസ്ഥാനത്ത് പടരുന്നതിൽ 94 ശതമാനവും ഒമിക്രോൺ ; അടുത്ത മൂന്നാഴ്ച നിർണായകം; ആരോഗ്യമന്ത്രി

തിരുവനന്തപുരം: കേരളത്തിലെ കോവിഡ് കേസുകളിൽ 94 ശതമാനവും ഒമിക്രോൺ വകഭേദമെന്ന് ആരോഗ്യ വകുപ്പ് മന്ത്രി വീണ ജോർജ്. വീണാ ജോർജ്. പരിശോധിക്കുന്ന സാമ്പിളുകളിൽ 94 ശതമാനവും ഒമിക്രോൺ ആണെന്ന് മന്ത്രി വ്യക്തമാക്കി. സാമ്പിളുകളിൽ 6 ശതമാനം മാത്രമാണ് ഡെൽറ്റ വകഭേദം സ്ഥിരീകരിക്കുന്നതെന്നും മന്ത്രി വ്യക്തമാക്കി.

ഫെബ്രുവരി ആദ്യവാരം ചില ജില്ലകളിൽ കൊവിഡ് വ്യാപനം കൂടുമെന്നും മന്ത്രി മുന്നറിയിപ്പ് നൽകിയിട്ടുണ്ട്. വിദേശത്ത് നിന്ന് വരുന്നവരിൽ 80% ഒമിക്രോൺ വകഭേദമാണ്. വെന്‍റിലേറ്റർ, ഐസിയു ഉപയോഗത്തിൽ കുറവ് വന്നിട്ടുണ്ടെന്നും മന്ത്രി മാധ്യമങ്ങളോട് പറഞ്ഞു. ഒമിക്രോണിന്‍റെ തീവ്രത ഡെല്‍റ്റയെക്കാളും കുറവാണെങ്കിലും നിസാരമായി കാണരുതെന്ന് മന്ത്രി വ്യക്തമാക്കി. വിട്ടുമാറാത്ത ചുമ, കടുത്ത പനി എന്നിവയുണ്ടെങ്കില്‍ ഉടനെ ഡോക്ടറെ സമീപിക്കേണ്ടതാണെന്നും അറിയിച്ചു. സംസ്ഥാനത്തെ കൊവിഡ് രോ​ഗികളില്‍ 96.4 ശതമാനം വീടുകളില്‍ തന്നെ കഴിയുകയാണെന്നും അതിനാല്‍ തന്നെ ഗൃഹപരിചരണത്തിന് ആശുപത്രിയിലേത് പോലെതന്നെ പ്രാധാന്യം നല്‍കുമെന്നും മന്ത്രി കൂട്ടിച്ചേർത്തു.