കൈ വിറച്ചു പോലും; ‘മനസ്സ് പതറുമ്പോൾ കൈവിറച്ചുപോകുന്ന സാധാരണത്വം ഒരു കുറവായി കാണുന്നില്ല’; ജീവിതത്തില്‍ ഗ്രാമറും സ്‌പെല്ലിങ്ങും തെറ്റാതിരിക്കാന്‍ ജാഗരൂകനാണ്; ന്യായീകരണവുമായി കേരള വിസി

തിരുവനന്തപുരം: ജീവിതത്തിന്റെ ഗ്രാമറും സ്പെല്ലിംഗു തെറ്റാതിരിക്കാൻ ജാഗരൂകനാണെന്ന് കേരളാ സർവകലാശാല വൈസ് ചാൻസലർ പ്രൊഫ. വിപി മഹാദേവൻ പിള്ള. മനസ്സുപതറുമ്പോള്‍ കൈവിറച്ച് പോവുന്ന സാധാരണത്വം ഒരു കുറവായി താന്‍ കാണുന്നില്ലെന്നും അദ്ദേഹം പ്രസ്താവനയിൽ പറഞ്ഞു.

‘ജീവിതത്തിന്റെ ഗ്രാമറും സ്‌പെല്ലിങ്ങും തെറ്റാതിരിക്കാൻ ഞാൻ പരമാവധി ജാഗരൂകനാണ്. മനസ്സ് പതറുമ്പോൾ കൈവിറച്ചുപോകുന്ന സാധരണത്വം ഒരു കുറവായി കാണുന്നില്ല. ഗുരുഭൂതൻമാരുടെ നല്ല പാഠങ്ങൾ ഉൾക്കൊള്ളാൻ പരമാവധി ശ്രദ്ധിക്കാറുണ്ട്. കൂടുതൽ പ്രതികരണത്തിനില്ല’- വി.സി പറഞ്ഞു.

വിസി (VC) അയച്ച കത്തിലെ തെറ്റുകള്‍ ചൂണ്ടിക്കാട്ടി ഗവര്‍ണര്‍ ആരിഫ് മുഹമ്മദ് ഖാന് (Arif Mohammad Khan) രൂക്ഷമായി പ്രതികരിച്ചിരുന്നു. ഇതിനെ ന്യായീകരിക്കാനായാണ് ഇപ്പോൾ വിസി മറുകുറുപ്പ് ഇറക്കിയത്. രാഷ്ട്രപതിക്ക് ഡിലിറ്റ് നല്‍കാന്‍ കഴിയില്ലെന്നായിരുന്നു കത്തിലെ പരാമര്‍ശം. ഈ കത്തിലെ അക്ഷരതെറ്റുകളാണ് തന്നെ ലജ്ജിപ്പിച്ചതെന്ന് ഗവര്‍ണര്‍ കഴിഞ്ഞ ദിവസം മാധ്യമങ്ങളോട് പറഞ്ഞത്.

കണ്ണൂർ വിസി പുനർ നിയമനം നിയമവിരുദ്ധമായിരുന്നില്ലെന്നും ഗവർണർ പറഞ്ഞു. നടപടിക്രമങ്ങൾ പാലിക്കാത്തതായിരുന്നു പ്രശ്‌നം. സർക്കാർ നൽകിയ മറുപടി അംഗീകരിക്കുന്നില്ല. ചാൻസലർ പദവിയിലേക്കുള്ള തിരിച്ചുവരവിൽ കാത്തിരുന്ന് മാത്രം തീരുമാനം. തിരിച്ചുവന്നാൽ തിരുത്തൽ ശക്തിയായി പ്രവർത്തിക്കും. ആഭ്യന്തര തർക്കങ്ങളിൽ നിന്നും തലയൂരാൻ പ്രതിപക്ഷം തന്നെ കരുവാക്കുകയാണെന്നും ഗവർണർ വ്യക്തമാക്കിയിരിന്നു.