കണ്ണീർക്കടലായി കിഴക്കമ്പലം; സിപിഎമ്മുകാരുടെ മർദ്ദനത്തിൽ കൊല്ലപ്പെട്ട ദീപുവിന്റെ പോസ്റ്റ് മോർട്ടം ഇന്ന്; സംസ്കാരം വൈകിട്ട്

കിഴക്കമ്പലം: കണ്ണീർക്കടലായി കിഴക്കമ്പലം. സിപിഎമ്മുകാരുടെ മർദ്ദനത്തിൽ കൊല്ലപ്പെട്ട ദീപുവിന്റെ (Deepu Murder) പോസ്റ്റ് മോർട്ടം ഇന്ന് രാവിലെ നടക്കും. ശേഷം ബന്ധുക്കൾക്ക് മൃതദേഹം വിട്ടുകൊടുക്കും. കോട്ടയം മെഡിക്കൽ കോളേജിലാണ് പോസ്റ്റ് മോർട്ടം നടക്കുക. ദീപുവിന്റെ കുടുംബാംഗങ്ങളുടെ ആവശ്യപ്രകാരമാണ് പോസ്റ്റ് മോർട്ടം കോട്ടയത്തേക്ക് മാറ്റിയത്. ഇന്നലെ രാത്രിയാണ് മൃതദേഹം കോട്ടയത്തേക്ക് കൊണ്ട് പോയത്.

വൈകിട്ട് 5.30 ന് കാക്കനാട് അത്താണി പൊതുശമ്ശാനത്തിൽ ആയിരിക്കും ദീപുവിനെ സംസ്കരിക്കുക. അതിനുമുമ്പ് ട്വന്‍റി 20 നഗറിൽ മൂന്ന് മണി മുതൽ പൊതുദർശനത്തിന് വയ്ക്കും. പിന്നീട് വിലാപയാത്രയായാണ് വീട്ടിലേയ്ക്ക് കൊണ്ടുപോകുക തുടർന്ന് ചടങ്ങുകൾക്കു ശേഷം സംസ്കരിക്കും. അതേസമയം കഴിഞ്ഞ 12നാണ് ദീപുവിന് സിപിഎം പ്രവർത്തകരുടെ മർദ്ദനമേറ്റത്. സ്ട്രീറ്റ് ലൈറ്റ് ചലഞ്ചിനു കെഎസ്ഇബി തടസ്സം നിന്നത് എംഎൽഎ ശ്രീനിജനും സർക്കാരും കാരണമാണെന്നു ചൂണ്ടിക്കാട്ടി വീടുകളിൽ 15 മിനിറ്റു വിളക്കണച്ചു പ്രതിഷേധിക്കാൻ ട്വന്റി ട്വന്റി തീരുമാനിച്ചിരുന്നു.

ഇതിന്റെ ഭാഗമായി ദീപുവും പ്രതിഷേധ സമരത്തിൽ പങ്കാളിയായി. ഇതിൽ പ്രകോപിതരായാണ് സിപിഎം പ്രവർത്തകർ ദീപുവിനെ മർദ്ദിച്ചത്. തുടർന്ന് അവശനിലയിലായ ദീപുവിനെ വാർ്ഡമെമ്പറും സമീപവാസികളും ചേർന്നാണ് ആശുപത്രിയിൽ പ്രവേശിപ്പിച്ചത്. ആക്രമണത്തിൽ ദീപുവിന്റെ തലയ്‌ക്കും, വയറിനുമാണ് ഗുരുതരമായി പരിക്കേറ്റത്. ഇന്നലെ ഉച്ചയോടെ ദീപുവിന് മസ്തിഷ്‌ക മരണം സംഭവിക്കുകയായിരുന്നു. സംഭവത്തിൽ നാല് സിപിഎം പ്രവർത്തകരെ പോലീസ് അറസ്റ്റ് ചെയ്തിട്ടുണ്ട്.