ഇബ്രാഹിം ബാദുഷ പഠിച്ച കള്ളൻ!!! നീതുവിനോട് കാണിച്ചത് കൊടുംവഞ്ചന? നിർണ്ണായക വിവരങ്ങൾ പുറത്ത്

കോട്ടയം: കോട്ടയത്ത് നവജാത ശിശുവിനെ തട്ടിക്കൊണ്ടുപോയ (Kottayam Child Kidnapping Case)നീതുവിന്റെ കാമുകൻ ഇബ്രാഹിം ബാദുഷ യെക്കുറിച്ചുള്ള കൂടുതൽ വിവരങ്ങൾ പുറത്ത്. ഇയാളെ കഴിഞ്ഞ ദിവസമാണ് പോലീസ് അറസ്റ്റ് ചെയ്തത്. ബാദുഷ തന്റെ പക്കൽ നിന്നും സ്വർണവും പണവും തട്ടിയതായി നീതു പോലീസിന് മൊഴി നൽകിയിരുന്നു. ഈ മൊഴിയുടെ അടിസ്ഥാനത്തിൽ കേസ് എടുത്താണ് പോലീസ് ഇബ്രാഹിം ബാദുഷയെ അറസ്റ്റ് ചെയ്തത്. വഞ്ചനാക്കുറ്റവും ഗാർഹിക-ബാലപീഡന നിയമപ്രകാരമുള്ള വകുപ്പുകളും ചേർത്താണ് പോലീസ് കേസ് എടുത്തിരിക്കുന്നത്. 30 ലക്ഷം രൂപയും സ്വർണവുമാണ് ഇയാൾ നീതുവിന്റെ പക്കൽ നിന്നും തട്ടിയെടുത്തത്. ഇതിനായി തന്നെയും ഏഴ് വയസ്സുള്ള തന്റെ മകനെയും ഇയാൾ ഉപദ്രവിച്ചിരുന്നതായി നീതു പറയുന്നു. ഇബ്രാഹിം ബാദുഷ ലഹരിക്ക് അടിമയാണെന്നും നീതു പോലീസിനോട് വ്യക്തമാക്കിയിട്ടുണ്ട്.

അതേസമയം നീതുവിന്റെ കാമുകൻ ഇബ്രാഹിം ബാദുഷയെ ഇന്ന് കോടതിയിൽ ഹാജരാക്കും. രാവിലെ ഏറ്റുമാനൂർ ഫസ്റ്റ് ക്ലാസ് മജിസ്‌ട്രേറ്റ് കോടതിയിലാണ് ഹാജരാക്കുക. കുട്ടിയെ ആശുപത്രിയിൽ നിന്നും തട്ടിക്കൊണ്ടുപോയ സംഭവത്തിൽ നീതുവിനെ റിമാൻഡ് ചെയ്തു. 21 ദിവസത്തേക്ക് ആണ് റിമാൻഡ് ചെയ്തത്.
വ്യാഴാഴ്ച ഉച്ചയോടെയാണ് കോട്ടയം മെഡിക്കൽ കോളേജിൽ നിന്ന് നവജാത ശിശുവിനെ ആരോഗ്യപ്രവർത്തകയുടെ വസ്ത്രം ധരിച്ചെത്തി നീതു തട്ടിയെടുത്തത്. ഇടുക്കി സ്വദേശികളുടെ മൂന്ന് ദിവസം മാത്രം പ്രായമുള്ള കുഞ്ഞിനെയാണ് നീതു മോഷ്ടിച്ചത്. പൊലീസിന്റെ സമയോചിതമായ ഇടപെടലിലൂടെ കുട്ടിയെ ഒരു മണിക്കൂറിനുള്ളില്‍ തന്നെ കണ്ടെത്തി. കാമുകനായ ഇബ്രാഹിം ബാദുഷയുമായുള്ള ബന്ധം നഷ്ടപ്പെടാതിരിക്കാനാണ് എംബിഎ ബിരുദധാരിയായ നീതു ഈ കടുംകൈ ചെയ്തത്. ഇബ്രാഹിമിന്‍റെ കുട്ടിയാണെന്ന് തെറ്റിദ്ധരിപ്പിച്ച് ബന്ധം തുടരാനായിരുന്നു നീക്കം.

കുട്ടിയെ തട്ടിയെടുത്ത് ഹോട്ടലിലെത്തിയ നീതു കുട്ടിക്കൊപ്പമുള്ള ഫോട്ടോ കാമുകന് അയയ്ക്കുകയും ചെയ്തു. കൂടാതെ വീഡിയോ കോളിലും സംസാരിച്ചു. ടിക് ടോക്കിൽ പരിചയപ്പെട്ട കളമശ്ശേരി സ്വദേശിയായ ഇബ്രാഹിമുമായി രണ്ട് വർഷമായി നീതു ബന്ധത്തിലായിരുന്നു. തുടർന്ന് ഗർഭിണി ആവുകയും ചെയ്തു. പക്ഷേ ഗർഭം അലസി. എന്നാൽ ഇക്കാര്യം കാമുകനെ അറിയിച്ചില്ല. പറഞ്ഞാൽ അയാൾ തന്നെ വിട്ടുപോകും എന്നായിരുന്നു നീതുവിന്റെ ഭയം. വിവാഹ മോചിതയാണെന്നാണ് നീതു കാമുകനെ അറിയിച്ചിരുന്നത്. ഇബ്രാഹിമിന്റെ വീട്ടുകാരുമായും നീതു പരിചയത്തിൽ ആയിരുന്നു. ഇബ്രാഹിമും വീട്ടുകാരും നിരന്തരം പ്രസവകാര്യം തിരക്കിയപ്പോൾ കുട്ടിയെ തട്ടി എടുക്കാമെന്ന തന്ത്രമൊരുക്കുകയായിരുന്നു.