നാളെ കൊടിയേറ്റ്; ഏറ്റുമാനൂർ മഹാദേവക്ഷേത്രത്തിൽ ഉത്സവം 3 മുതൽ

കോട്ടയം: കേരളത്തിലെ അതിപ്രസിദ്ധമായ ഏറ്റുമാനൂർ മഹാദേവ ക്ഷേത്രത്തിലെ ഉത്സവത്തിന് നാളെ കൊടിയേറും. മാർച്ച് 3 മുതൽ 12 വരെ നടത്തുമെന്ന് ക്ഷേത്ര ഉപദേശക സമിതി അറിയിച്ചിരിക്കുന്നത്. കൊടിയേറ്റിനുള്ള കൊടിക്കൂറ ഘോഷയാത്ര ഫെബ്രുവരി 27ന് വൈകിട്ട് നടന്നു. മാർച്ച് 3ന് രാവിലെ 9.30നു തന്ത്രി താഴമൺ മഠം കണ്ഠര് രാജീവര്, മേൽശാന്തി മൈവാടി പത്മനാഭൻ സന്തോഷ് എന്നിവരുടെ കാർമികത്വത്തിലാണു കൊടിയേറ്റ്.

എട്ടാം ഉത്സവദിനമായ മാർച്ച് 10നാണ് ചരിത്രപ്രസിദ്ധമായ ഏഴരപ്പൊന്നാന ദർശനം. ദർശനത്തിനു പാസ് നിയന്ത്രണം ഇല്ലെങ്കിലും തിരക്ക് ഒഴിവാക്കാൻ ക്യൂ ഏർപ്പെടുത്തുമെന്ന് സമിതി സെക്രട്ടറി കെ.എൻ.ശ്രീകുമാർ, അഡ്മിനിസ്ട്രേറ്റീവ് ഓഫിസർ ആർ.പ്രകാശ് എന്നിവർ പറഞ്ഞു.

ഉത്സവത്തിൽ ഡോ. വൈക്കം വിജയലക്ഷ്മിയുടെ ഗായത്രിവീണ സംഗീതനിശ, ഏഴരപ്പൊന്നാന ദർശന ദിവസം കെ.എൻ.ശശികുമാറിന്റെ നാഗസ്വരം, ചോറ്റാനിക്കര സുബാഷ്മാരാറിന്റെയും സംഘത്തിന്റെയും പഞ്ചവാദ്യം, നടൻ ജയറാമും 111 കലാകാരൻമാരും ചേർന്ന് സ്പെഷൽ പാഞ്ചാരിമേളം, കലാമണ്ഡലം ക്ഷേമാവതിയുടെ നൃത്തം, മട്ടന്നൂർ ശങ്കരൻകുട്ടിയുടെയും സംഘത്തിന്റെയും പാഞ്ചാരിമേളം, ദുർഗാ വിശ്വനാഥിന്റെയും സംഘത്തിന്റെയും ഭക്തിഗാനമേള, പി.ടി.എൻ.രാമനാഥന്റെയും സംഘത്തിന്റെയും നാഗസ്വരം എന്നിവ ഉണ്ടാവും.

അതേസമയം കേരളത്തിലെ തലയെടുപ്പുള്ള ഗജവീരൻമാർ ഉത്സവദിനങ്ങളിൽ അണിനിരക്കും. പൊതുജനങ്ങൾക്കു വാഹനങ്ങൾ പാർക്ക് ചെയ്യുന്നതിനുള്ള സൗകര്യം മണർകാട്–പട്ടിത്താനം ബൈപാസിനു സമീപം ഒരുക്കും.