രാജ്യത്ത് ഏറ്റവും ചൂട് കൂടുതലുള്ള നഗരമായി കോട്ടയം: ചുട്ടുപൊള്ളി അക്ഷരനഗരി

കോട്ടയം: രാജ്യത്ത് തന്നെ ഏറ്റവും ചൂടുള്ള നഗരങ്ങളുടെ പട്ടികയില്‍ ഒന്നാമതായി (Kottayam) കോട്ടയം. 37 ഡിഗ്രി സെൽഷ്യസിന് മുകളിലാണ് പകൽ സമയങ്ങളിൽ കോട്ടയത്തെ താപനില. ചൂടിന്റെ കാര്യത്തില്‍ രണ്ടാം സ്ഥാനത്ത് ആന്ധ്രായിലെ നന്ദ്യാലാണ്.

കാലാവസ്ഥ വകുപ്പിന്റെ കണക്കുകള്‍ പ്രകാരം കോട്ടയമാണ് ഞായറാഴ്ച രാജ്യത്ത് ഏറ്റവും കൂടുതല്‍ ചൂട് രേഖപ്പെടുത്തിയ നഗരം. 37.3 ഡിഗ്രി സെല്‍ഷ്യസിന് മുകളിലാണ് പകല്‍ ഇവിടെ ചൂട് അനുഭവപ്പെട്ടത്. മുന്‍ വര്‍ഷം ഇത് 36 ഡിഗ്രി സെല്‍ഷ്യസിന് മുകളിലായിരുന്നു. പ്രളയത്തിന് പിന്നാലെ കോട്ടയം നഗരത്തില്‍ 35 ഡിഗ്രി സെല്‍ഷ്യസിലേക്ക് താപ നില ഉയര്‍ന്നിരുന്നു. ആ താപനില ഉയര്‍ന്ന് ഇപ്പോള്‍ 37 ഡിഗ്രി സെല്‍ഷ്യസില്‍ എത്തി നില്‍ക്കുകയാണ്. സമീപകാലത്തൊന്നും താപനില ഇത്രയധികം ഉയര്‍ന്നിട്ടില്ലെന്നാണ് കാലാവസ്ഥ വിദഗ്ധർ പറയുന്നത്.

: സംസ്ഥാനത്ത് ചൂട് കൂടുന്ന സാഹചര്യത്തിൽ ജാ​ഗ്രത നിർദേശം നൽകി ആരോ​ഗ്യവകുപ്പ്. സൂര്യാതപവുമായി ബന്ധപ്പെട്ട ആരോ​ഗ്യപ്രശ്നങ്ങൾ കണ്ടെത്തി ശരിയായ ചികിത്സ ഉറപ്പാക്കണമെന്ന് ഡിഎംഒമാർക്ക് നിർദേശം നൽകി. പ്രായമായവർ, കുട്ടികൾ, ​ഗർഭിണികൾ, ​ഗുരുതര രോ​ഗമുള്ളവർ, വെയിലത്ത് ജോലി ചെയ്യുന്നവർ എന്നിവർ പ്രത്യേകം ശ്രദ്ധിക്കണമെന്നും ആരോ​ഗ്യവകുപ്പ് വ്യക്തമാക്കി.ശരീരം ചുവന്ന് തിണർക്കുക, ശക്തമായ തലവേദന, തലകറക്കം, അബോധാവസ്ഥ, മന്ദ​ഗതിയിലുള്ള നാഡിമിടിപ്പ് എന്നിവയാണ് സൂര്യാഘാതത്തിന്റെ ലക്ഷണങ്ങൾ. ഇത്തരം അവസ്ഥകളിൽ ഉടൻ തന്നെ ചികിത്സ തേടണം