കോഴിക്കോട് മെഡിക്കൽ കോളേജിലെ ആൾക്കൂട്ട മർദനം: അന്വേഷണം ദ്രുതഗതിയിൽ;തൂങ്ങിമരിച്ച നിലയിൽ കണ്ടെത്തിയ വിശ്വനാഥന്റെ ഷർട്ട് കണ്ടെടുത്തു

കോഴിക്കോട് : ഭാര്യയുടെ പ്രസവത്തിനായി കോഴിക്കോട് മെഡിക്കൽ കോളജിലെത്തിയപ്പോൾ മോഷണം നടത്തിയെന്ന് ആരോപിച്ച് ആൾക്കൂട്ടം ചോദ്യം ചെയ്തു മർദിച്ചതിനു പിന്നാലെ കാണാതാവുകയും പിന്നാലെ തൂങ്ങിമരിച്ച നിലയിൽ‌ കണ്ടെത്തുകയും ചെയ്ത ആദിവാസി യുവാവ് വിശ്വനാഥന്റെ ഷർട്ട് അന്വേഷണസംഘം കണ്ടെടുത്തു. മൃതദേഹം കണ്ടെത്തിയ കോഴിക്കോട് ഗവ. മെഡിക്കൽ കോളേജ് ആശുപത്രിക്ക് സമീപത്തെ കുറ്റിക്കാടിനടുത്തു നിന്നാണ് ഷർട്ടും കണ്ടെടുത്തത്. ഷർട്ടിന്റെ പോക്കറ്റിൽ നിന്ന് 140 രൂപയും കണ്ടെടുത്തു. ഷർട്ടിൽ ചെളിയുടെ സാന്നിദ്ധ്യമുണ്ട്.

വിശ്വനാഥന്റെ ഭാര്യ ബിന്ദുവിനെ കഴിഞ്ഞ ചൊവ്വാഴ്ച പ്രസവത്തിനായി മെഡിക്കൽ കോളേജ് മാതൃശിശു സംരക്ഷണ കേന്ദ്രത്തിൽ പ്രവേശിപ്പിച്ചിരുന്നു. ബുധനാഴ്ച ബിന്ദു ആൺകുഞ്ഞിനു ജന്മം നൽകി. വിവാഹം കഴിഞ്ഞ് ഏറെക്കാലത്തിനു ശേഷം പ്രാർത്ഥനകൾക്കും വഴിപാടുകൾക്കും ശേഷം ജനിച്ച കുഞ്ഞിനെക്കാണാനായി ആശുപത്രി മുറ്റത്തെ കൂട്ടിരിപ്പുകാർക്കായുള്ള സ്ഥലത്ത് കാത്തു നിൽക്കുകയായിരുന്നു വിശ്വനാഥൻ. തുടർന്നാണ് കാത്തിരിപ്പുകാരിലാരുടെയോ മൊബൈൽ ഫോണും പണവും നഷ്ടമായെന്നും വിശ്വനാഥൻ മോഷ്ടാവാണെന്നും ആരോപിച്ച് ചിലർ ബഹളം വയ്ക്കുന്നതും ചിലർ വിശ്വനാഥനെ ചോദ്യം ചെയ്യുകയും മർദിക്കുകയും ചെയ്യുന്നത്. പിന്നീട് കാണാതായ വിശ്വനാഥനെ ആശുപത്രിക്കു സമീപത്തെ മരത്തിൽ തൂങ്ങിമരിച്ച നിലയിൽ കണ്ടെത്തുകയായിരുന്നു.