ഓടിക്കൊണ്ടിരുന്ന കെഎസ്ആർടിസി ബസിന് തീ പിടിച്ചു, യാത്രക്കാരെല്ലാം രക്ഷപ്പെട്ടു, ഒഴിവായത് വൻ ദുരന്തം

തിരുവനന്തപുരം : ഓടിക്കൊണ്ടിരുന്ന കെഎസ്ആർടിസി ബസിന് തീപിടിച്ചുണ്ടായ അപകടത്തിൽ ബസ് പൂർണ്ണമായും കത്തിനശിച്ചു. ഡ്രൈവറുടേയും കണ്ടക്ടറുടേയും പെട്ടെന്നുള്ള ഇടപെടൽമൂലം ഒഴിവായത് വൻ ദുരന്തം. യാത്രക്കാരെയെല്ലാം രക്ഷപ്പെടുത്തി.

ചിറയിൻ കീഴിൽ നിന്നും കണിയാപുരത്തേക്ക് പോയ ബസാണ് തീപിടിച്ചത്. വാഹനത്തിന്റെ മുന്നിൽ നിന്ന് പുക ഉയരുന്നത് ശ്രദ്ധയിൽപ്പെട്ട ഡ്രൈവർ ഉടൻ തന്നെ ബസ് റോഡരികിലേക്ക് നിർത്തുകയായിരുന്നു. തുടർന്ന് യാത്രക്കാരോട് പുറത്തിറങ്ങാൻ ആവശ്യപ്പെട്ടു. ബസ്സിൽ 39 യാത്രക്കാരാണുണ്ടായിരുന്നത് .
ബസ് പൂർണ്ണമായും കത്തിനശിച്ചു. പിന്നീട് ഫയർഫോഴ്സെത്തി തീയണക്കുകയായിരുന്നു. സംഭവത്തിൽ ചിറയിൻകീഴ് പോലീസിൽ പരാതി നൽകിയിട്ടുണ്ട്.