‘സർക്കാർ ചെലവിൽ കെ.എസ്.ടി.എ. സമ്മേളനം ’; വേദിയാകുന്നത് സർക്കാർ ഇൻഡോർ സ്റ്റേഡിയം, പരാതിയുമായി യൂത്ത് കോൺഗ്രസും ബിജെപിയും

കാസർഗോഡ് : കെ എസ് ടി എ സമ്മേളനത്തിന് വേദിയാകുന്നത് സർക്കാരിന്റെ കീഴിലുള്ള കാസർഗോഡ് കാഞ്ഞങ്ങാട്ടെ ഇൻഡോർ സ്റ്റേഡിയം. നിർമാണത്തിലിരിക്കുന്ന കെട്ടിടം യൂണിയൻ സമ്മേളനത്തിന് സൗജന്യമായി വിട്ടുനൽകിയത് വിവാദമായിരുന്നു. ഇതിനെ തുടർന്ന് യൂത്ത് കോൺഗ്രസും ബിജെപിയും കാസർഗോഡ് കളക്ടർക്ക് പരാതി നൽകി.

പ്രതിനിധി സമ്മേളനമാണ് ഇൻഡോർ സ്റ്റേഡിയത്തിൽ നടക്കാനൊരുങ്ങുന്നത്. സ്റ്റേജും മറ്റു സൗകര്യങ്ങളുമൊരുക്കുന്ന പണി തുടങ്ങിയിട്ട് ദിവസങ്ങളായി. അതിനാൽ വയറിങ് ഉൾപ്പെടെ ഈ കെട്ടിടത്തിൽ നടക്കേണ്ടുന്ന അന്തിമപ്രവൃത്തികളെല്ലാം നിർത്തിവെക്കേണ്ടിവന്നിരിക്കുകയാണ് .
സമ്മേളനത്തിന് സ്റ്റേഡിയം തുറന്നുകൊടുക്കണമെന്നാവശ്യപ്പെട്ട് നഗരസഭയുടെ കത്ത്‌ കിട്ടിയിട്ടുണ്ടെന്ന് അസി. എൻജിനിയർ അറിയിച്ചു. എന്നാൽ ഇങ്ങനൊരു കത്ത് നൽകിയത് അറിഞ്ഞില്ലെന്നാണ് നഗരസഭാ സെക്രട്ടറി പി. ശ്രീജിത്ത് വ്യക്തമാക്കിയത്