രാഷ്ട്രീയ വൈരികളെ ആയുധം കൊണ്ട് തീർക്കുന്ന മാർക്സിസ്റ്റ് ഭീരുത്വത്തിന്റെ വികൃതമുഖം വെളിപ്പെട്ട കൊലപാതകം; കെ ടി ജയകൃഷ്ണൻ മാസ്റ്ററെ അനുസ്മരിച്ച് കേരളം; ബലിദാനദിനത്തിൽ സംസ്ഥാനമൊട്ടാകെ അനുസ്മരണ സമ്മേളനങ്ങൾ

കണ്ണൂർ: രാഷ്ട്രീയ വൈരികളെ ആയുധംകൊണ്ട് വെട്ടിവീഴ്ത്തുന്ന മാർക്സിസ്റ്റ് ക്രൂരതയുടെ വികൃതമുഖം വെളിപ്പെട്ട സംഭവമായിരുന്നു കെ ടി ജയകൃഷ്ണൻ മാസ്റ്റർ വധം. കണ്ണൂരിൽ സംഘപരിവാർ രാഷ്ട്രീയത്തിന്റെ കരുത്തും യുവമോർച്ച സംസ്ഥാന അദ്ധ്യക്ഷനുമായിരുന്ന ജയകൃഷ്ണൻ മാസ്റ്ററെ 1999 ഡിസംബർ ഒന്നിനാണ് ഒരു സംഘം കമ്മ്യൂണിസ്റ്റ് നരാധമന്മാർ ക്രൂരമായി വെട്ടിക്കൊലപ്പെടുത്തിയത്. പാനൂർ മൊകേരി ഈസ്റ്റ് എ യു പി സ്കൂൾ അദ്ധ്യാപകനായിരുന്ന കെ ടി യെ സ്കൂളിൽ ക്ലാസെടുത്തുകൊണ്ടിരിക്കുമ്പോൾ കുരുന്ന് വിദ്യാർത്ഥികളുടെ മുന്നിലിട്ടാണ് കമ്മ്യൂണിസ്റ്റുകാർ ക്രൂരമായി വെട്ടിക്കൊലപ്പെടുത്തിയത്.

ബലിദാന ദിനത്തോടനുബന്ധിച്ച് മൊകേരിയിലെ സ്‌മൃതിമണ്ഡപത്തിൽ രാവിലെ 07:30 ന് പുഷ്‌പാർച്ചന നടന്നു. അനുസ്മരണ സാംഘിക് അല്പസമയത്തിനുള്ളിൽ ആരംഭിക്കും. വൈകുന്നേരം അഞ്ചുമണിക്ക് യുവമോർച്ചയുടെ നേതൃത്വത്തിൽ പാനൂരിൽ ബഹുജന റാലിയും അനുസ്മരണ സമ്മേളനവും നടക്കും. പാനൂർ ഗുരുസന്നിധി പരിസരത്ത് നിന്നാരംഭിക്കുന്ന റാലി ബസ്റ്റാന്റ് ജംഗ്‌ഷനിൽ സമാപിക്കും. യുവമോർച്ച സംസ്ഥാന അദ്ധ്യക്ഷൻ സി ആർ പ്രഫുൽ കൃഷ്ണൻ സമ്മേളനം ഉദ്‌ഘാടനം ചെയ്യും. ബിജെപി സംസഥാന സമിതിയംഗം അഡ്വ. വി പി പദ്മനാഭൻ അനുസ്മരണ പ്രഭാഷണം നടത്തും.