സംസ്ഥാനത്ത് തീവ്രവാദ സംഘടനകളുടെ കൺസോർഷ്യം തെരഞ്ഞെടുപ്പിൽ ഇടപെടുന്നു; ഇടത് വലത് മുന്നണികൾ ഇവരുമായി രാഷ്ട്രീയധാരണയുണ്ടാക്കുന്നു; വടകരയിലെ സ്ഥാനാർത്ഥിയെ മാറ്റിയത് തീവ്രവാദ സംഘടനകളുടെ സമ്മർദ്ദത്താലെന്ന് പി കെ കൃഷ്ണദാസ്

തിരുവനന്തപുരം: ലോക്‌സഭാ തെരഞ്ഞെടുപ്പിൽ തീവ്രവാദ സംഘടനകളുടെ കൺസോർഷ്യവുമായി എൽ ഡി എഫും യു ഡി എഫും ധാരണ ഉണ്ടാക്കിയെന്നും എസ് ഡി പി ഐ ഒരുക്കിയ ഇഫ്‌താർ വിരുന്നിൽ സിപിഎം-കോൺഗ്രസ് സ്ഥാനാർത്ഥികൾ പങ്കെടുത്തത് ഇതിന് അടിവരയിടുന്നതാണെന്നും ബിജെപി സംസ്ഥാന സമിതിയംഗം പികെ കൃഷ്ണദാസ്. തിരുവനന്തപുരത്ത് വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം. വടകരയിലെ യു ഡി എഫ് സ്ഥാനാർത്ഥിയെ മാറ്റി പാലക്കാട് എം എൽ എ യെ പകരം മത്സരിപ്പിക്കുന്നത് ഈ തീവ്രവാദ സംഘടനകളുടെ സമ്മർദ്ദം കാരണമാണെന്നും അദ്ദേഹം പറഞ്ഞു.

എൽഡിഎഫ് കോഴിക്കോട്ട് എളമരം കരീമിന് വേണ്ടി തീവ്രവാദ സംഘടനകളുമായി ധാരണയുണ്ടാക്കിയതായും അദ്ദേഹം ആരോപിച്ചു. സംസ്ഥാന സർക്കാർ കൊണ്ടുവന്ന കെ റൈസ് പദ്ധതിയിൽ അടിമുടി അഴിമതിയാണെന്നും കോടിക്കണക്കിന് രൂപ സംസ്ഥാന ഖജനാവിന് നഷ്ടം വരുന്നതായും അദ്ദേഹം പറഞ്ഞു. സത്യഭാമയുടെ പ്രസ്താവനകൾ അപലപനീയമാണെന്ന് അദ്ദേഹം കൂട്ടിച്ചേർത്തു.