ലൂസിഫറിന് മൂന്നാം ഭാഗം !! എമ്പുരാനേക്കാൾ വലിയ സിനിമയാകും; ആരാധകരെ ആവേശത്തിലാഴ്ത്തി പ്രഖ്യാപനവുമായി മോഹൻലാൽ

ആരാധകർ ഏറെ പ്രതീക്ഷയോടെ കാത്തിരിക്കുന്ന എമ്പുരാന്റെ റിലീസ് നാളെ നടക്കാനിരിക്കെ ലൂസിഫറിന് മൂന്നാം ഭാഗമുണ്ടാകുമെന്നും അത് എമ്പുരാനേക്കാള്‍ വലിയ സിനിമയായിരിക്കുമെന്നും വെളിപ്പെടുത്തി നടൻ മോഹന്‍ലാല്‍. ഇന്ന് വൈകുന്നേരം കൊച്ചിയില്‍ നടന്ന വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം. സിനിമയ്ക്ക് വേണ്ടി കാത്തിരിക്കുന്ന എല്ലാ പ്രേക്ഷകര്‍ക്കും മോഹന്‍ലാല്‍ നന്ദിയറിയിച്ചു. സ്വപ്‌നമാണോ എന്ന് തോന്നും വിധം അത്രത്തോളം എമ്പുരാന്‍ വളര്‍ന്നുകഴിഞ്ഞുവെന്നും മോഹന്‍ലാല്‍ പറഞ്ഞു.

“ലൂസിഫറിന്റെ വിജയമാണ് എമ്പുരാന്റെ തുടക്കം. ഈ കഥ മൂന്ന് സിനിമകളായിട്ടാണ് വരുന്നത്. ഇതിനകം തന്നെ അതിന്റെ കഥയുടെ രൂപമുണ്ട്. ഈ കഥ ഒരു സിനിമയില്‍ പറയാന്‍ പറ്റില്ലെന്ന് തുടക്കത്തിലേ വ്യക്തമായിരുന്നു. ലൂസിഫറിന്റെ അമ്പതാം ദിവസം ഞങ്ങള്‍ എമ്പുരാന്‍ പ്രഖ്യാപിച്ചു. അന്ന് ഇത് ഇത്ര വലിയ സിനിമയാകുമെന്ന് കരുതിയിരുന്നില്ല. എന്നാല്‍ ഇപ്പോള്‍ എമ്പുരാന്റെ അവസാനം ഞങ്ങള്‍ പറയുന്നത് ഇതിനൊരു മൂന്നാം ഭാഗമുണ്ടെന്നാണ്. അത് ഇതിനും വലിയൊരു സിനിമയായി മാറാന്‍ സാധ്യതയുണ്ട്. അങ്ങനെ സംഭവിക്കട്ടെയെന്ന് ഞാന്‍ പ്രാർത്ഥിക്കുന്നു.”- മോഹന്‍ലാല്‍ പറഞ്ഞു.

മോഹന്‍ലാല്‍, പൃഥ്വിരാജ്, ടൊവിനോ തോമസ്, മഞ്ജുവാര്യര്‍, ആന്റണി പെരുമ്പാവൂര്‍, ഗോകുലം ഗോപാലന്‍ എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.