“പ്രധാനമന്ത്രിയുടെ പ്രസംഗത്തിൽ രാഷ്ട്രീയ പ്രൊപ്പഗാണ്ടയില്ല, ഹർജിക്കാരന് തിരിച്ചടി!!! തമിഴ്നാട് സ്വദേശിയുടെ ഹർജി തള്ളി ഹൈക്കോടതി

ദില്ലി: പ്രധാനമന്ത്രിയുടെ പ്രസംഗത്തിനെതിരെ തിരുച്ചിറപ്പള്ളി സ്വദേശി നൽകിയ ഹർജി തള്ളി ഹൈക്കോടതി(Madras HC Rejects Plea Against Telecast Of PM Modi’s Speech). ഉത്തരാഖണ്ഡിലെ ആദിശങ്കര സമാധിയിൽ പ്രധാനമന്ത്രി നടത്തിയ പൂജയും പ്രസംഗവും തമിഴ്‌നാട്ടിലെ 16 ക്ഷേത്രങ്ങളിൽ ടെലികാസ്റ്റ് ചെയ്തിരുന്നു. ഇത് രാഷ്‌ട്രീയ പ്രൊപ്പഗാണ്ടയാണെന്ന് വ്യക്തമാക്കിക്കൊണ്ടാണ് തിരുച്ചിറപ്പള്ളി സ്വദേശി രംഗരാജൻ നരസിംഹൻ എന്ന വ്യക്തി കോടതിയെ സമീപിച്ചത്. എന്നാൽ ആദിശങ്കരന്റെ പാരമ്പര്യവും ധർമ്മത്തിന്റെ ആവശ്യകതയുമാണ് നരേന്ദ്ര മോദി പഠിപ്പിച്ചത് എന്നും അത് ഒരിക്കലും രാഷ്‌ട്രീയ പ്രൊപ്പഗാണ്ട ആവില്ലെന്നും ആക്ടിംഗ് ചീഫ് ജസ്റ്റിസ് മുവീശ്വർ നാഥ് ബണ്ഡാരി അദ്ധ്യക്ഷനായ ബെഞ്ച് അറിയിച്ചു. ഇതിനുപിന്നാലെയാണ് ഹർജി മദ്രാസ് ഹൈക്കോടതി തള്ളിയത്.

അതേസമയം ക്ഷേത്ര പ്രവേശന നിയമങ്ങൾ ലംഘിച്ചുകൊണ്ടാണ് ഇത് ടെലികാസ്റ്റ് ചെയ്തത് എന്നാണ് ഹർജിയിൽ രംഗരാജൻ നരസിംഹൻ പറഞ്ഞത്. അനേകം ആളുകൾ പ്രസംഗം കൂടിനിന്ന് കണ്ടുവെന്നും ഹർജിയിൽ പരാമർശിച്ചു. എന്നാൽ ഇത് ഒരിക്കലും രാഷ്‌ട്രീയ പ്രൊപ്പഗാണ്ടയായി കണക്കാക്കാൻ കഴിയില്ലെന്ന് ഹൈക്കോടതി വ്യക്തമാക്കി. ആദി ശങ്കരന്റെ പാരമ്പര്യവും ധർമ്മത്തിന്റെ പ്രാധാന്യവുമാണ് പ്രധാനമന്ത്രി വ്യക്തമാക്കിയത്. നരേന്ദ്ര മോദിയുടെ പ്രസംഗത്തിൽ രാഷ്‌ട്രീയം കലർത്തിയിട്ടില്ല. അദ്ദേഹം തീർത്ഥാടന കേന്ദ്രങ്ങളെക്കുറിച്ചും, ജ്യോതിർലിംഗങ്ങളെക്കുറിച്ചുമാണ് സംസാരിച്ചതെന്നും കോടതി ചൂണ്ടിക്കാട്ടി.