ഒരു കൈയിൽ ഖുർആൻ, മറുകൈയിൽ ത്രിവർണപതാക; നൂഹിൽ മദ്രസ വിദ്യാർത്ഥികളുടെ തിരംഗയാത്ര: ശ്രദ്ധേയമായി 500ലേറെ വിദ്യാർത്ഥികൾ അണിനിരന്നു; ‘ഛാത്ര ശക്തി, രാഷ്ട്ര ശക്തി’ എന്ന സന്ദേശവുമായി മാർച്ച്, പ്രധാനമന്ത്രിയുടെ നിർദേശം പിന്തുടരുകയാണെന്ന് പസ്മാന്ദ ഫൗണ്ടേഷൻ

നൂഹ് (ഹരിയാന): 79-ാമത് സ്വാതന്ത്ര്യദിനാഘോഷങ്ങൾക്ക് മുന്നോടിയായി ഹരിയാനയിലെ നൂഹിൽ സംഘടിപ്പിച്ച തിരംഗയാത്ര ശ്രദ്ധേയമായി. വിവിധ മദ്രസകളിൽ നിന്നുള്ള 500ലേറെ വിദ്യാർത്ഥികൾ പങ്കെടുത്ത യാത്രയിൽ ഒരു കൈയിൽ ഖുർആനും മറുകൈയിൽ ത്രിവർണപതാകയുമായാണ് നിരവധി വിദ്യാർത്ഥികൾ അണിനിരന്നത്. പസ്മാന്ദ ഫൗണ്ടേഷന്റെ ആഭിമുഖ്യത്തിലാണ് യാത്ര സംഘടിപ്പിച്ചത്.

യാസിൻ മിയോ ഡിഗ്രി കോളേജിൽ നിന്നാണ് തിരംഗയാത്ര ആരംഭിച്ചത്. ത്രിവർണപതാകയും ഖുർആനും കൈകളിലേന്തിയ വിദ്യാർത്ഥികൾ നഗരത്തിലെ പ്രധാനവീഥികളിലൂടെ മാർച്ച് നടത്തി. സെൻട്രൽ മാർക്കറ്റിലൂടെ കടന്നുപോയ യാത്ര ഗാന്ധി പാർക്കിലെത്തി. ദേശഭക്തി മുദ്രാവാക്യങ്ങളും ദേശീയതയുടെ സന്ദേശവും ഉയർത്തിയായിരുന്നു വിദ്യാർത്ഥികളുടെ മുന്നേറ്റം.

ജിഹാദി സ്ഥാപനങ്ങൾ എന്ന് ആരോപിക്കുന്നവർക്കുള്ള മറുപടിയാണ് തിരംഗയാത്രയെന്ന് പസ്മാന്ദ ഫൗണ്ടേഷൻ ഡയറക്ടർ മുഹമ്മദ് മെറാജ് റെയ്ൻ പറഞ്ഞു. മദ്രസ വിദ്യാർത്ഥികളുടെ ഒരു കൈയിൽ ഖുർആനും മറുകൈയിൽ കമ്പ്യൂട്ടർ മൗസും ഉണ്ടായിരിക്കണമെന്ന പ്രധാനമന്ത്രി നരേന്ദ്ര മോദിയുടെ നിർദേശമാണ് തങ്ങൾ പിന്തുടരുന്നതെന്നും അദ്ദേഹം വ്യക്തമാക്കി. മദ്രസകളിൽ മതപഠനത്തോടൊപ്പം ആധുനിക വിദ്യാഭ്യാസത്തിനും കമ്പ്യൂട്ടർ പരിജ്ഞാനത്തിനും കൂടുതൽ പ്രാധാന്യം നൽകേണ്ടതുണ്ടെന്നും റെയ്ൻ പറഞ്ഞു.

യാത്രയിൽ മദ്രസ വിദ്യാർത്ഥിനികളുടെ പങ്കാളിത്തവും ശ്രദ്ധേയമായി. ബുർഖ ധരിച്ച നിരവധി പെൺകുട്ടികൾ ത്രിവർണപതാകയുമായി മാർച്ചിൽ പങ്കെടുത്തു. മദ്രസകളിൽ പഠിക്കുന്ന പെൺകുട്ടികൾ വീടിന്റെ നാല് ചുവരുകൾക്കുള്ളിൽ മാത്രം ഒതുങ്ങാതെ പൊതുസമൂഹത്തിന്റെ ഭാഗമായും ദേശീയ പരിപാടികളിലും സജീവമായി പങ്കെടുക്കുന്നതിന്റെ ഉദാഹരണമാണ് ഇതെന്ന് ഫൗണ്ടേഷൻ അംഗമായ റുക്ൻ പറഞ്ഞു. മതപഠനത്തിനൊപ്പം ആധുനിക വിദ്യാഭ്യാസവും ദേശീയബോധവും പ്രോത്സാഹിപ്പിക്കണമെന്ന സന്ദേശമാണ് യാത്ര മുന്നോട്ടുവെച്ചതെന്നും സംഘാടകർ വ്യക്തമാക്കി.