മഹാരാഷ്ട്രയില്‍ സഖ്യം ഇഴയുന്നു: ഗവര്‍ണറ കാണാനുള്ള നീക്കം അവസാന നിമിഷം റദ്ദാക്കി

മുംബൈ:മഹാരാഷ്ട്രയില്‍ കോണ്‍ഗ്രസ്-എന്‍സിപി-ശിവസേന നേതാക്കള്‍ ഒരുമിച്ച് ഗവര്‍ണറ കാണാനുള്ള നീക്കം അവസാന നിമിഷം റദ്ദാക്കി. സഖ്യവുമായി മുന്നോട്ട് പോവുന്ന കാര്യം ഗവര്‍ണറെ അറിയിക്കാനായി നിശ്ചയിച്ചിരുന്ന കൂടിക്കാഴ്ചയാണ് ഉപേക്ഷിച്ചത്. ഔദ്യോഗിക പ്രഖ്യാപനം നടക്കാത്തതിനാല്‍ ഉടന്‍ നീക്കം വേണ്ടെന്നാണ് തീരുമാനം.

മഹാരാഷ്ട്രയില്‍ സഖ്യം രൂപീകരിച്ചിട്ടില്ലെന്നാണ് മൂന്ന് പാര്‍ട്ടികളുടെയും ഔദ്യോഗിക നിലപാട്. സേനയുമായി സഹകരിക്കണോ എന്ന കാര്യത്തില്‍ എന്‍സിപിയുമായി ഇനിയും ചര്‍ച്ചകള്‍ വേണമെന്ന് കോണ്‍ഗ്രസ് ഹൈക്കമാന്‍ഡ് പറയുന്നു. എന്നാല്‍ സഖ്യം രൂപീകരിക്കനുള്ള പൊതുമിനിമം പരിപാടിയുടെ കരട് മൂന്ന് പാര്‍ട്ടിയുടേയും സംസ്ഥാനനേതാക്കള്‍ ഒരുമിച്ചിരുന്ന് തയാറാക്കി. ഇതിന് പിന്നാലെയാണ് സഖ്യകക്ഷികളെപോലെ ഗവര്‍ണറെ കാണാനും തീരുമാനിച്ചത്.

എന്നാല്‍ പൊതുമിനിമം പരിപാടിക്ക് അന്തിമരൂപം കൊടുക്കുന്നതടക്കം നിര്‍ണായക തീരുമാനങ്ങളെടുക്കാന്‍ സോണിയാ ഗാന്ധിയും പവാറും നാളെ ചര്‍ച്ച നടത്താനിരിക്കുകയാണ്. അതിന് മുന്‍പ് സഖ്യമായെന്ന് വ്യാഖ്യാനിക്കാവുന്ന നീക്കം വേണ്ടെന്ന് കോണ്‍ഗ്രസ് നിലപാടെടുത്തതാണ് കൂടിക്കാഴ്ച ഉപേക്ഷിക്കാന്‍ കാരണമെന്ന് അറിയുന്നു.