റാഗിംങ്ങിന്‍റെ പേരിൽ കോളേജ് വിദ്യാർത്ഥികളുടെ കൂട്ടത്തല്ല്: അഞ്ച് പേർ അറസ്റ്റിൽ

മലപ്പുറം: മലപ്പുറത്ത് ചങ്ങരംകുളത്ത് റാഗിങ്ങിന്റെ പേരിൽ കോളേജ് വിദ്യാർത്ഥികൾ തമ്മിൽ കൂട്ടയടി. കഴിഞ്ഞ ദിവസമാണ് വളയംകുളം അസ്സബാഹ് കോളേജിൽ വിദ്യാര്‍ത്ഥികള്‍ തമ്മില്‍ തല്ലിയത്. സംഭവത്തിൽ അഞ്ച് വിദ്യാർത്ഥികളെ ചങ്ങരംകുളം പൊലീസ് അറസ്റ്റ് ചെയ്തു.

തവനൂർ തൃക്കണാപുരം ചോലയിൽ ഷഹസാദ്, പാലപ്പെട്ടി മച്ചിങ്ങൽ മുഹമ്മദ് ഫാദിഹ്, മാറഞ്ചേരി തലക്കാട് മുഹമ്മദ് ഇർഫാൻ, കൊള്ളനൂർ ജാറം പൂഴികുന്നത്ത് മുർഷിദ്, അണ്ടത്തോട് ചോലയിൽ ഫായിസ്, എന്നിവരെയാണ് ചങ്ങരംകുളം പൊലീസ് അറസ്റ്റ് ചെയ്തത്.

കഴിഞ്ഞ ദിവസമാണ് കേസിനാസ്പദമായ സംഭവം നടന്നത്. ചങ്ങരംകുളം വളയംകുളം അസ്സബാഹ് ആർട്ട്സ് ആൻഡ് സയൻസ് കോളേജിലെ സീനിയർ വിദ്യാർത്ഥികളാണ് ജൂനിയർ വിദ്യാർത്ഥികളെ നടുറോഡിലിട്ട് മർദ്ദിച്ച് അവശരാക്കിയത്. തുടർന്ന് പരിക്കേറ്റ വിദ്യാർത്ഥികളെ ആശുപത്രിയിൽ പ്രവേശിപ്പിച്ചു.

അതേസമയം കോളേജിന് സമീപത്ത് സംസ്ഥാന പാതയിൽ വെച്ചാണ് വിദ്യാർത്ഥികൾ തമ്മിൽ തല്ലിയത്. കോളേജും സംസ്ഥാന പാതയും തമ്മിൽ ഇരുന്നൂറ് മീറ്റർ ദൂരമുണ്ട്. തുടർന്ന് വിദ്യാർത്ഥികൾ തമ്മിൽ തല്ലുന്നതിന്റെ ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിച്ചിരുന്നു.