എഫ്.എ.കപ്പിൽ ചുംബിച്ച് മാഞ്ചസ്റ്റർ സിറ്റി; ആവേശ ഫൈനലിൽ യുണൈറ്റഡിനെ തോൽപ്പിച്ചത് ഒന്നിനെതിരെ രണ്ട് ഗോളുകൾക്ക്

ലണ്ടന്‍ : എഫ്.എ. കപ്പ് ഫുട്‌ബോള്‍ കിരീടത്തിൽ ചുംബിച്ച് മാഞ്ചെസ്റ്റര്‍ സിറ്റി. ഫൈനലില്‍ ചിരവൈരികളായ മാഞ്ചെസ്റ്റര്‍ യുണൈറ്റഡിനെ ഒന്നിനെതിരെ രണ്ട് ഗോളുകൾക്ക് കീഴടക്കിയാണ് സിറ്റി കിരീടമുയര്‍ത്തിയത്. സിറ്റിയുടെ ഏഴാം എഫ്.എ.കപ്പ് കിരീടമാണിത്. നായകന്‍ ഇല്‍കൈ ഗുണ്ടോഗന്‍ ഇരട്ട ഗോളുമായി സിറ്റിക്കുവേണ്ടി കൊടുങ്കാറ്റായപ്പോൾ യുണൈറ്റഡിനായി നായകന്‍ ബ്രൂണോ ഫെര്‍ണാണ്ടസ് പെനാൽറ്റിയിലൂടെ വല കുലുക്കി

നേരത്തെ ഇംഗ്ലീഷ് പ്രീമിയര്‍ ലീഗ് കിരീടം സ്വന്തമാക്കിയ സിറ്റിക്ക് ഇതോടെ വരാനിരിക്കുന്ന ചാമ്പ്യന്‍സ് ലീഗ് ഫൈനലില്‍ ഇറ്റാലിയൻ വമ്പന്മാരായ ഇന്റര്‍ മിലാനെ കീഴടക്കിയാല്‍ ഹാട്രിക്ക് കിരീടം നേടാം.

മത്സരം തുടങ്ങി 13-ാം സെക്കന്‍ഡില്‍ തന്നെ യുണൈറ്റഡിനെ ഞെട്ടിച്ചുകൊണ്ട് സിറ്റിയ്ക്കായി ഒരു തകർപ്പൻ ലോങ് റേഞ്ചറിലൂടെ ഗുണ്ടോഗന്‍ വലകുലുക്കി. ഇതോടെ എഫ്.എ കപ്പ് ഫൈനലിലെ അതിവേഗ ഗോള്‍ എന്ന റെക്കോഡ് ഗുണ്ടോഗന്‍ സ്വന്തം പേരിലാക്കി.

എന്നാല്‍ 33-ാം മിനിറ്റില്‍ ലഭിച്ച പെനാല്‍റ്റി ബ്രൂണോ ഫെര്‍ണാണ്ടസ് കൃത്യമായി വലയിലെത്തിച്ചപ്പോൾ യുണൈറ്റഡിന് സമനില പിടിച്ചു . ബോക്‌സിനകത്തുവെച്ച് ആരോണ്‍ വാന്‍ ബിസ്സാക്കയുടെ ഹെഡ്ഡര്‍ സിറ്റി താരം ജാക്ക് ഗ്രീലിഷിന്റെ കൈയ്യില്‍ക്കൊണ്ടു. ഇതോടെ റഫറി വാറിന്റെ സഹായത്തോടെ യുണൈറ്റഡിന് അനുകൂലമായി പെനാല്‍റ്റി വിധിക്കുകയായിരുന്നു.

രണ്ടാം പകുതിയില്‍ 51-ാം മിനിറ്റില്‍ ഗുണ്ടോഗന്‍ വീണ്ടും ടീമിനായി ഗോളടിച്ചു. ബോക്‌സിനകത്തെ കൂട്ടപ്പൊരിച്ചിലിനൊടുവില്‍ പന്ത് ലഭിച്ച ഗുണ്ടോഗന്റെ ഷോട്ട് പ്രതിരോധതാരങ്ങള്‍ക്കിടയിലൂടെ വലയിലെത്തുകയായിരുന്നു. സർവ്വശക്തിയുമെടുത്ത് തിരിച്ചടിക്കാൻ ശ്രമിക്കിച്ചെങ്കിലും യുണൈറ്റഡിന് ഗോളടിക്കാനായില്ല.

മാര്‍ക്കസ് റാഷ്‌ഫോര്‍ഡ് നേതൃത്വം നൽകിയ മുന്നേറ്റനിര ഇന്ന് നിറംമങ്ങിയതും ടീമിന് തിരിച്ചടിയായി. ആന്റണിയുടെയും ലിസാന്‍ഡ്രോ മാര്‍ട്ടിനെസ്സിന്റെയും അഭാവം യുണൈറ്റഡ് നിരയില്‍ എടുത്തു കാണിച്ചു. പ്രതിരോധത്തിൽ മികവ് തെളിയിച്ച റാഫേല്‍ വരാനെയും ലൂക്ക് ഷോയുമാണ് സിറ്റിയുടെ പല ആക്രമണങ്ങളില്‍ നിന്നും യുണൈറ്റഡിനെ രക്ഷിച്ചത്.