“ഞങ്ങളെ സംബന്ധിച്ചിടത്തോളം മണിപ്പൂരും വടക്കുകിഴക്കും ഇന്ത്യയുടെ ഐക്യത്തിന്റെ കേന്ദ്രമാണ്,” മണിപ്പൂരില്‍ കോണ്‍ഗ്രസ് വിഘടനവാദം പ്രോത്സാഹിപ്പിച്ചു; തുറന്നടിച്ച് നരേന്ദ്ര മോദി

ഇംഫാല്‍: വികസന പ്രവര്‍ത്തനങ്ങളില്‍ ശ്രദ്ധ കേന്ദ്രീകരിക്കുന്നതിന് പകരം വിഘടനാവാദം പ്രോത്സാഹിപ്പിക്കാനാണ് കോണ്‍ഗ്രസ് ശ്രമിച്ചതെന്ന് പ്രധാനമന്ത്രി (Narendra Modi) നരേന്ദ്രമോദി. മണിപ്പൂരിലെ ജനങ്ങളെ വെര്‍ച്വല്‍ പ്രസംഗത്തില്‍ അഭിസംഭോദന ചെയ്ത് സംസാരിക്കുകയായിരുന്നു അദ്ദേഹം.

മണിപ്പൂരിനെ കൊള്ളയടിക്കുന്നതിലായിരുന്നു കോൺഗ്രസിന്റെ ശ്രദ്ധ. ‘മിസ്റ്റർ’ എന്ന് വിളിക്കപ്പെടുന്ന ഇത്തരം നേതാക്കളുടെ കൈകളിലാണ് സംസ്ഥാനമെന്നും പ്രധാനമന്ത്രി മോദി പറഞ്ഞു. ബിജെപി മണിപ്പൂരില്‍ എയിംസും കായിക സര്‍വ്വകലാശാലയും നിര്‍മ്മിക്കാന്‍ പദ്ധതിയിടുകയാണെന്നും സംസ്ഥാനത്തെ ജനങ്ങള്‍ക്ക് 100 കോടി രൂപയുടെ സ്റ്റാര്‍ട്ടപ്പ് ഫണ്ട് അനുവദിക്കാന്‍ പദ്ധതിയുണ്ടെന്നും മോദി പറഞ്ഞു. “ഇത് ആത്മനിര്‍ഭര്‍ ഭാരതത്തിന്റെ കാലമാണ്. ഈ ദശകം വികസനത്തിന്റെയും പുരോഗതിയുടെയും ദശകമാണ്, മണിപ്പൂര്‍ ഇന്ന് ഈ ദിശയിലേക്ക് അതിവേഗം നീങ്ങുകയാണ്,” പ്രധാനമന്ത്രി വ്യക്തമാക്കി.

ബിജെപിയുടെ നേതൃത്വത്തിൽ സംസ്ഥാനത്തു നടന്ന വികസനപ്രവർത്തനത്തിന് കണക്കില്ലെന്നും വിഘടനവാദികളുടെ ആക്രമണം അവസാനിപ്പിക്കാൻ കഴിഞ്ഞത് വലിയ നേട്ടമാണെന്നു പ്രധാനമന്ത്രി കൂട്ടിച്ചേർത്തു.