‘ഒഴിവാക്കിയതിൽ അത്ഭുതമില്ല’; ‘താരപ്രചാരകരുടെ പട്ടികയില്‍ ഞാനില്ലാത്തതിന്റെ കാരണം രഹസ്യമല്ലെന്ന് പരിഹസിച്ച് മനീഷ് തിവാരി

ദില്ലി: പഞ്ചാബിലെ നിയമസഭാ തെരഞ്ഞെടുപ്പിനുള്ള കോണ്‍ഗ്രസ് താരപ്രചാരകരുടെ പട്ടികയില്‍ നിന്നൊഴിവാക്കിയതില്‍ നേതൃത്വത്തിനെ വിമര്‍ശിച്ച് മനീഷ് തിവാരി എം.പി രംഗത്ത് .

പട്ടികയില്‍ തന്റെ പേര് ഉള്‍പ്പെട്ടിരുന്നെങ്കിലാണ് അത്ഭുതമെന്നും തന്റെ പേര് ഒഴിവാക്കിയതില്‍ അത്ഭുതപ്പെടാനില്ല. പേരുണ്ടായിരുന്നെങ്കില്‍ ആശ്ചര്യപ്പെടുമായിരുന്നുവെന്നും മനീഷ് തിവാരി പരിഹസിച്ചു.

എന്നാൽ ഇതിനുള്ള കാരണങ്ങള്‍ രഹസ്യമൊന്നുമല്ലെന്നായിരുന്നു പാര്‍ട്ടി നേതൃത്വത്തിനുനേരെ മനീഷ് തിവാരിയുടെ പ്രതികരണം. പാര്‍ട്ടി നേതൃത്വത്തില്‍ മൊത്തത്തിലൊരു അഴിച്ചുപണി ആവശ്യപ്പെട്ട് മനീഷ് തിവാരി ഉള്‍പ്പെടെയുള്ള നേതാക്കള്‍ സോണിയാ ഗാന്ധിക്ക് കത്തെഴുതിയിരുന്നു.

ഈ സംഭവം മുന്‍നിര്‍ത്തിയാണ് താരപ്രചാരകരുടെ പട്ടികയില്‍ നിന്നും തന്നെയും ഗുലാം നബി ആസാദ് അടക്കമുള്ള മുതിര്‍ന്ന നേതാക്കളേയും ഒഴിവാക്കിയതെന്ന് പരോക്ഷമായി സൂചിപ്പിച്ചുകൊണ്ടായിരുന്നു തിവാരിയുടെ പ്രതികരണം. ട്വിറ്ററിലൂടെയാണ് അദ്ദേഹം പ്രതികരിച്ച് രംഗത്തെത്തിയത്.

അതേസമയം മുന്‍ പിസിസി അധ്യക്ഷന്‍ സുനില്‍ ഝാക്കര്‍ മുഖ്യമന്ത്രിയാകുന്നത് തടയാന്‍ ദില്ലിയിലെ സങ്കുചിതര്‍ നിലപാട് സ്വീകരിച്ചിട്ടുണ്ടാകാമെന്നും മനീഷ് തിവാരി പറഞ്ഞു.