മേഘേദാട്ടു അണക്കെട്ട് തർക്കം! തമിഴ്‌നാട് നിയമസഭയിൽ മുഖ്യമന്ത്രി വിജയ്‌യും ഉദയനിധി സ്റ്റാലിനും തമ്മിൽ വാക്‌പോര്

ചെന്നൈ: കാവേരി നദിയിലെ മേഘേദാട്ടു അണക്കെട്ട് നിർമ്മാണ വിഷയത്തിൽ തമിഴ്‌നാട് നിയമസഭയിൽ ഭരണ-പ്രതിപക്ഷാംഗങ്ങൾ തമ്മിൽ രൂക്ഷമായ വാക്‌പോര്. കർണാടക സർക്കാരിന്റെ ഏകപക്ഷീയമായ നീക്കങ്ങൾക്കെതിരെ സർവ്വകക്ഷി യോഗം വിളിച്ചു ചേർക്കണമെന്ന് ആവശ്യപ്പെട്ട് ഉദയനിധി സ്റ്റാലിൻ സഭയിൽ പ്രത്യേക ശ്രദ്ധക്ഷണിക്കൽ പ്രമേയം കൊണ്ടുവന്നതോടെയാണ് തർക്കം ഉടലെടുത്തത്. കർണാടക വിഷയം ചർച്ച ചെയ്യാൻ സർവ്വകക്ഷി യോഗങ്ങൾ വിളിക്കുമ്പോൾ തമിഴ്‌നാട് സർക്കാർ മടിച്ചു നിൽക്കുകയാണെന്ന് പ്രതിപക്ഷം ആരോപിച്ചു.

എന്നാൽ തമിഴ്‌നാടിന്റെ അവകാശങ്ങളിൽ സർക്കാർ യാതൊരുവിധ വിട്ടുവീഴ്ചയും വരുത്തില്ലെന്ന് മുഖ്യമന്ത്രി വിജയ് സഭയിൽ വ്യക്തമാക്കി. അണക്കെട്ട് നിർമ്മാണത്തിനെതിരെ തമിഴ്‌നാട് നിയമസഭ ഇതിനോടകം പ്രമേയം പാസാക്കിയിട്ടുണ്ടെന്നും വിഷയത്തിൽ ഇടപെടണമെന്ന് ആവശ്യപ്പെട്ട് പ്രധാനമന്ത്രി നരേന്ദ്രമോദിക്ക് നേരിട്ട് കത്തയച്ചിട്ടുണ്ടെന്നും അദ്ദേഹം ഓർമ്മിപ്പിച്ചു. അതിനാൽ നിലവിൽ സർവ്വകക്ഷി യോഗത്തിന്റെ ആവശ്യമില്ലെന്നും വൈകാരികമായ ഇത്തരം വിഷയങ്ങളെ രാഷ്ട്രീയ നേട്ടങ്ങൾക്കായി ഉപയോഗിക്കരുതെന്നും മുഖ്യമന്ത്രി മറുപടി നൽകി. വിഷയം നിയമപോരാട്ടത്തിലൂടെ നേരിടാനാണ് സർക്കാരിന്റെ തീരുമാനമെന്ന് വിജയ് കൂട്ടിച്ചേർത്തു.

കർണാടകയുമായി ചർച്ച നടത്താനുള്ള തന്റെ നിർദ്ദേശത്തെ എതിർത്ത പ്രതിപക്ഷത്തിന് ശക്തമായ ഭാഷയിലാണ് മുഖ്യമന്ത്രി മറുപടി നൽകിയത്. ശത്രുരാജ്യങ്ങൾ പോലും പ്രശ്നങ്ങൾ പരിഹരിക്കാൻ ചർച്ചയുടെ പാത തിരഞ്ഞെടുക്കുമ്പോൾ അയൽസംസ്ഥാനവുമായി സംസാരിക്കുന്നതിൽ തെറ്റില്ലെന്നായിരുന്നു വിജയിയുടെ നയം. തമിഴ്‌നാട്ടിലെ ജനങ്ങളുടെ അവകാശ സംരക്ഷണത്തിനായി ഏതറ്റം വരെ പോകാനും നാണംകെടാനും താൻ തയ്യാറാണെന്ന് വിജയ് വികാരാധീനനായി സഭയിൽ പറഞ്ഞു.