പശ്ചിമേഷ്യൻ പ്രതിസന്ധി! ബദൽ മാർഗങ്ങളുമായി ഭാരതം ; റഷ്യൻ എണ്ണ ഇറക്കുമതിയിൽ കുതിച്ചു ചാട്ടം ; അംഗോളയിൽ നിന്നുള്ള എണ്ണ വാങ്ങലിൽ ഉണ്ടായത് 255 ശതമാനം വർധനവ്

പശ്ചിമേഷ്യയിൽ നിലനിൽക്കുന്ന കടുത്ത സംഘർഷങ്ങളുടെ പശ്ചാത്തലത്തിൽ ഇന്ത്യയുടെ റഷ്യൻ എണ്ണ ഇറക്കുമതിയിൽ വൻ കുതിച്ചുചാട്ടം. മാർച്ചിലെ കണക്കുകൾ പ്രകാരം റഷ്യയിൽ നിന്നുള്ള എണ്ണ ഇറക്കുമതി ഒൻപത് മാസത്തെ ഏറ്റവും ഉയർന്ന നിരക്കിലെത്തി. ഹോർമുസ് കടലിടുക്കിലെ പ്രതിസന്ധി കാരണം പശ്ചിമേഷ്യയിൽ നിന്നുള്ള വിതരണം തടസ്സപ്പെട്ടതോടെയാണ് ഇന്ത്യൻ എണ്ണക്കമ്പനികൾ റഷ്യയെയും അംഗോളയെയും കൂടുതൽ ആശ്രയിക്കാൻ തുടങ്ങിയത്.

കഴിഞ്ഞ ജൂൺ മാസത്തിന് ശേഷമുള്ള ഏറ്റവും ഉയർന്ന നിരക്കാണ് മാർച്ചിൽ രേഖപ്പെടുത്തിയത്. ഫെബ്രുവരിയിൽ 29 ദശലക്ഷം ബാരലായിരുന്ന റഷ്യൻ എണ്ണ ഇറക്കുമതി മാർച്ചിൽ 55.5 ദശലക്ഷം ബാരലായി ഉയർന്നു. അതായത് മുൻ മാസത്തെ അപേക്ഷിച്ച് 89 ശതമാനത്തിന്റെ വർധനവാണ് ഉണ്ടായിരിക്കുന്നത്. റഷ്യൻ എണ്ണക്കമ്പനികൾക്ക് മേലുള്ള ഉപരോധങ്ങളിൽ അമേരിക്ക നൽകിയ ഇളവുകളും ഈ വർധനവിന് പ്രധാന കാരണമായി.

അതേസമയം പശ്ചിമേഷ്യൻ പ്രതിസന്ധി ഇന്ത്യയുടെ മൊത്തത്തിലുള്ള എണ്ണ ഇറക്കുമതിയെ ബാധിച്ചിട്ടുണ്ട്. ഫെബ്രുവരിയിൽ 145 ദശലക്ഷം ബാരലായിരുന്ന മൊത്തം ഇറക്കുമതി മാർച്ചിൽ 127 ദശലക്ഷം ബാരലായി കുറഞ്ഞു. ഈ വിടവ് നികത്തുന്നതിനായി ആഫ്രിക്കൻ രാജ്യമായ അംഗോളയിൽ നിന്നുള്ള ഇറക്കുമതി ഇന്ത്യ 255 ശതമാനമായി വർധിപ്പിച്ചു. ഇതോടെ അംഗോളയിൽ നിന്നുള്ള എണ്ണ ഇറക്കുമതിയിൽ റെക്കോർഡ് നേട്ടമാണ് ഇന്ത്യ കൈവരിച്ചിരിക്കുന്നത്. നിലവിലെ സാഹചര്യത്തിൽ ഊർജ സുരക്ഷ ഉറപ്പാക്കുന്നതിനായി വിതരണ സ്രോതസ്സുകളിൽ ഇന്ത്യ വലിയ മാറ്റങ്ങൾ വരുത്തുന്നതായാണ് സാമ്പത്തിക വിദഗ്ധരുടെ വിലയിരുത്തൽ.