ചാണകമെന്ന് പരിഹസിച്ചു ! ഇനി പാർലമെന്റിൽ അവർ ചാണകത്തെ സഹിക്കട്ടെ ; പൂരം നടത്തിപ്പിൽ സമഗ്ര മാറ്റം കൊണ്ടുവരുമെന്ന് സുരേഷ് ഗോപി

തൃശ്ശൂർ : ചാണകമെന്ന് പരിഹസിച്ചവരോട് അതേ നാണയത്തിൽ തിരിച്ചടിച്ച് നിയുക്ത എംപി സുരേഷ് ഗോപി. ഇനി പാർലമെന്റിൽ കുറച്ചുകാലം അവർ ചാണകത്തെ സഹിക്കട്ടെയെന്ന് സുരേഷ് ഗോപി പറഞ്ഞു. തൃശ്ശൂരിൽ മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.

വിജയിച്ചാൽ കൊച്ചി മെട്രോ തൃശ്ശൂരിലേക്ക് നീട്ടുമെന്ന് പറഞ്ഞിരുന്നു. ഇതിനായുള്ള ശ്രമം തുടരുമെന്നും ഇതിനായി കഴിഞ്ഞ കുറേ വർഷങ്ങളായി ലോക്‌നാഥ് ബെഹ്‌റയുമായി ചർച്ചകൾ നടന്നുവരികയാണെന്നും സുരേഷ് ഗോപി പറയുന്നു. കൂടാതെ, ക്രോസ് ബൈപ്പാസ് എന്ന പദ്ധതിയും മനസിലുണ്ട്. മണ്ണുത്തി – ശങ്കരൻകുളങ്ങര- പൊന്നാനി റൂട്ടിലായിരിക്കും ഇത് വരുന്നത്. കേരളത്തിലെ ജനങ്ങളുടെ ഉന്നമനത്തിന് വേണ്ടിയായിരിക്കും മന്ത്രിസ്ഥാനം ലഭിച്ചാലും ഇല്ലെങ്കിലും പ്രവർത്തിക്കുകയെന്നും അദ്ദേഹം കൂട്ടിച്ചേർത്തു.

അതേസമയം, പൂരം നടത്തിപ്പ് പുതിയ രീതിയിലായിരിക്കും നടത്തുക. പൂരം നടത്തിപ്പിൽ മാറ്റങ്ങൾ കൊണ്ടുവരുന്നതുമായി ബന്ധപ്പെട്ട് കളക്ടറുമായി ഇന്നലെ സംസാരിച്ചിരുന്നെന്നും അദ്ദേഹം പറഞ്ഞു. വിജയിച്ചാൽ തന്റെ പ്രവർത്തനം തൃശ്ശൂർ മണ്ഡലത്തിൽ മാത്രമായി ഒതുക്കില്ലെന്ന് നേരത്തെ പറഞ്ഞിരുന്നു. അതിനാൽ തന്നെ, കേരളത്തിനും തമിഴ്‌നാടിനും വേണ്ടി എംപിയായി പ്രവർത്തിക്കുമെന്നും സുരേഷ് ഗോപി വ്യക്തമാക്കി.