പ്രധാനമന്ത്രിയെങ്കിലും ഞാന്‍ എപ്പോഴും ഒരു പാര്‍ട്ടി പ്രവര്‍ത്തകന്‍: മോദി

വാരാണസി: പ്രധാനമന്ത്രിയാണെങ്കിലും താനെപ്പോഴും ഒരു പാര്‍ട്ടി പ്രവര്‍ത്തകന്‍ ആയിരിക്കുമെന്ന് നരേന്ദ്ര മോദി. തന്‍റെ മണ്ഡലമായ
വാരാണസിയില്‍ വോട്ടര്‍മാരെ അഭിസംബോധന ചെയ്യുകയായിരുന്നു മോദി. ഈ വലിയ വിജയത്തിന് പാര്‍ട്ടി പ്രവര്‍ത്തകരോട് നന്ദി പറയുന്നു. താന്‍ എപ്പോഴും ഒരു പാര്‍ട്ടി പ്രവര്‍ത്തകനായിരിക്കും. പ്രധാനമന്ത്രിയെ ന്നത് രണ്ടാമതാണ്- മോദി പറഞ്ഞു.

അതോടൊപ്പം ബിജെപി ഹിന്ദി ഹൃദയഭൂമിയുടെ പാര്‍ട്ടിയാണ് എന്ന വാദവും തള്ളിയ മോദി വടക്കു കിഴക്കന്‍ സംസ്ഥാനങ്ങളില്‍ പോലും ബിജെപി ഭരിക്കുന്നുണ്ടെന്ന് ചൂണ്ടിക്കാട്ടി. കേരളത്തിലും ബംഗാളിലും ബിജെപി പ്രവര്‍ത്തകര്‍ നേരിടുന്ന ബുദ്ധിമുട്ടുകളും മോഡി വിശദീകരിച്ചു. ഇവിടങ്ങളിൽ പ്രവർത്തകർക്ക് അയിത്തവും അക്രമവും നേരിടേണ്ടി വരുന്ന സ്ഥിതിയുണ്ട്. ബിജെപിക്കാര്‍ വ്യാപകമായി ആക്രമിക്കപ്പെടുകയും ജീവന്‍ നഷ്ടമാകുന്ന സ്ഥിതി വരെ ഉണ്ടാകുന്നു, ഇത് തികഞ്ഞ ജനാധിപത്യ വിരുദ്ധതയാണ്. ഇന്ത്യയിലെ ഏറ്റവും ജനാധിപത്യ രീതിയിലുള്ള പാര്‍ട്ടി ബിജെപിയാണെന്നും മോഡി വ്യക്തമാക്കി.

ശാസ്ത്രത്തിനൊപ്പം രാജ്യത്തിന്‍റെ ചരിത്രത്തിനും സംസ്‌ക്കാരത്തിനും ഈ സര്‍ക്കാര്‍ ഒരു പോലെ പ്രധാന്യം നല്‍കും. എല്ലാ സര്‍ക്കാര്‍ സ്ഥാപനങ്ങളും ജനങ്ങളുടെതാണ്, എല്ലാവര്‍ക്കും അവയിൽ തുല്യ അവകാശവും അതു സൂക്ഷിക്കാനുള്ള ഉത്തരവാദിത്വവുമുണ്ട് എന്നും മോദി കൂട്ടിച്ചേർത്തു.

തിരഞ്ഞെടുപ്പിലെ വമ്പൻ വിജയത്തിനുശേഷം തൻ്റെ മണ്ഡലമായ
വാരാണസിയിലെ ജനങ്ങളോട് നന്ദി പറയാന്‍ എത്തിയതായിരുന്നു മോദി. അഞ്ച് ലക്ഷത്തോളം വോട്ടിന്‍റെ ഭൂരിപക്ഷത്തിലാണ് വാരണാസിയിൽ മോദി ജയിച്ചത്. കാശി വിശ്വനാഥ ക്ഷേത്രദർശനത്തോടെയാണ് മോഡി
വാരാണസിയിലെ വിജയാഘോഷം ആരംഭിച്ചത് . അതിന് ശേഷം
വാരാണസിയിലൂടെ മോദിയുടെ കൂറ്റൻ റോഡ് ഷോയും നടന്നു.